OILAVIY ZO‘RAVONLIKKA QARSHI QONUN USTUVORLIGI: YANGI HUQUQIY KAFOLATLAR AMALIYOTDA

OILAVIY ZO‘RAVONLIKKA QARSHI QONUN USTUVORLIGI: YANGI HUQUQIY KAFOLATLAR AMALIYOTDA

O‘zbekiston Respublikasida inson huquqlari, ayniqsa, xotin-qizlar va bolalar huquqlarini himoya qilish borasida tizimli va izchil ishlar amalga oshirilmoqda. 2025 yil 9 aprel kuni qabul qilingan “Oila va xotin-qizlarni qo‘llab-quvvatlash sohasini takomillashtirish munosabati bilan O‘zbekiston Respublikasining ayrim qonun hujjatlariga qo‘shimcha va o‘zgartishlar kiritish to‘g’risida”gi Qonun mazkur yo‘nalishdagi huquqiy kafolatlarni yanada mustahkamladi.

Mazkur Qonunga muvofiq, Oila kodeksiga kiritilgan muhim qo‘shimchalardan biri — sud tomonidan nikohdan ajratish ishlari ko‘rilayotganida oilaviy (ijtimoiy) zo‘ravonlikdan jabrlangan shaxsning talabiga ko‘ra yarashish uchun muddat tayinlanmasligi hisoblanadi. Bu norma zo‘ravon munosabatlar davom etishining oldini olish, jabrlanuvchi shaxsning xavfsizligini ta’minlash va uning haq-huquqlarini samarali himoya qilishga qaratilgan.

O‘zbekiston Respublikasi Ma’muriy javobgarlik to‘g’risidagi kodeksining 59-2-moddasida oilaviy (ijtimoiy) zo‘ravonlik tushunchasiga huquqiy jihatdan aniq ta’rif berilgan. Unga ko‘ra, quyidagi harakatlar oilaviy zo‘ravonlik hisoblanadi:

turmush o‘rtoq, sobiq turmush o‘rtoq, birga yashovchi shaxs yoki umumiy farzandga ega bo‘lgan shaxs tomonidan boshqa shaxsning ta’lim, mehnat, sog’liqni saqlash, mulk huquqlarini amalga oshirishga to‘sqinlik qilish;

shaxsiy buyumlar va mol-mulkka qasddan zarar etkazish;

shaxs sha’nini kamsitish, uni qo‘rqitish, yaqin qarindoshlaridan majburiy ajratib qo‘yish kabi xatti-harakatlar.

Agar ushbu harakatlarda jinoyat alomatlari mavjud bo‘lmasa, ular ma’muriy huquqbuzarlik sifatida baholanib, 10 dan 20 baravargacha bazaviy hisoblash miqdorida jarima yoki 10 sutkagacha ma’muriy qamoq jazosi bilan jazolanadi.

Moddaning ikkinchi qismida esa, jabrlanuvchi shaxsga engil tan jarohati etkazish, sog’lig’i yomonlashishiga olib kelgan zo‘ravon xatti-harakatlar ham ma’muriy javobgarlikka sabab bo‘lishi belgilangan. Bu holatlarda jarima miqdori saqlanadi, lekin ma’muriy qamoq muddati 15 sutkagacha oshiriladi.

Yangi huquqiy o‘zgarishlar, xususan, sud tomonidan yarashish muddati belgilanmasligi kabi normalar oilaviy zo‘ravonlikka uchragan shaxslar uchun muhim kafolat hisoblanadi. Bu kabi huquqiy yondashuvlar-zo‘ravonlikni rag’batlantirmaslik, jabrlanuvchilarni takroriy zo‘ravonlikdan himoya qilish, ularning daxlsizligi va sha’nini tiklash kabi muhim ijtimoiy maqsadlarga xizmat qiladi.

Qabul qilingan Qonun nafaqat oilaviy zo‘ravonlikka qarshi samarali kurashishni, balki oilalarda sog’lom muhit yaratish, xotin-qizlar va bolalarning huquqiy himoyasini ta’minlashda muhim ahamiyat kasb etadi.

Shu bois, har bir fuqaro, xususan, ayollar va yoshlar o‘z huquqlarini bilishi va himoya qilish mexanizmlaridan xabardor bo‘lishi jamiyat barqarorligi uchun muhim shartlardan biridir.

Janat AYMAG’ANBETOVA
Qoraqalpog’iston Respublikasi ma’muriy sudining sudyasi

RAQAMLI SUD: QONUN USTUVORLIGIGA ZAMONAVIY YONDASHUV

Chimboy tumanidagi “Doʻstlik” mahalla fuqarolar yigʻinida aholi bilan ochiq muloqot oʻtkazildi. Tadbirda Chimboy tumanlararo iqtisodiy sudi raisi B.Bekmuratov hamda jinoyat ishlari boʻyicha Chimboy tumani sudi tergov sudyasi R.Kaukishev ishtirok etishdi.

Uchrashuvda sudyalar tomonidan fuqarolarga Prezidentimizning 2025-yil 21-avgustda qabul qilingan “Sudlarning faoliyatiga sunʼiy intellekt texnologiyalarini joriy etish orqali odil sudlovga erishish darajasini oshirish hamda sud tizimining moddiy-texnik taʼminotini yaxshilashga doir chora-tadbirlar toʻgʻrisida”gi PF-140-sonli Farmoni hamda “Odil sudlov sohasida yuqori malakali kadrlar tayyorlash tizimini tubdan takomillashtirish chora-tadbirlari toʻgʻrisida”gi PF-141-sonli Farmonining mazmun-mohiyati keng tushuntirib berildi.

Taʼkidlandiki, Prezidentimizning joriy yil 21-avgustdagi PF-140-sonli Farmoni sud tizimida raqamlashtirishni yangi bosqichga olib chiqdi. Ushbu farmonga koʻra, endilikda sud ishlarini elektron tarzda yuritish imkoniyatlari kengaytiriladi, sunʼiy intellekt asosida ishlovchi tahlil platformalari joriy etilib, “aqlli sud zallari” va onlayn murojaat tizimlari keng koʻlamda faoliyat boshlaydi, sud qarorlarining shaffofligini taʼminlash uchun ochiq maʼlumotlar bazasi yaratiladi.

Shuningdek, fuqarolar uchun sudlarga murojaat qilish, ishlarni kuzatish va qarorlar bilan tanishish jarayoni ancha yengillashadi.

Yuqorida qayd etilgan, farmonlar orqali sud tizimida yangi bosqich boshlanmoqda. Xususan, sunʼiy intellekt texnologiyalari joriy etilishi, sud binolarining moddiy-texnik taʼminoti yaxshilanishi, sudyalar malakasi oshirilishi fuqarolarning odil sudlovga boʻlgan ishonchini mustahkamlaydi.

Tadbir davomida mahalla aholisi oʻzlarini qiziqtirgan savollarga javob oldi.

SUD FAOLIYATIDA SUN’IY INTELLEKTNI JORIY ETISH VA HUQUQBUZARLIKLARNING OLDINI OLISHDA MAHALLIY ORGANLAR BILAN HAMKORLIKNING AHAMIYATI

Jinoyat ishlari bo’yicha Kegeyli tumani sudi raisi R.Bekmuratova tomonidan tuman hokimligi majlislar zalida tegishli muassasa va tashkilot rahbarlari, mahalla raislari bilan uchrashuv oʻtkazildi.

Unda joriy yilning 21 avgut kuni qabul qilingan «Sudlar faoliyatiga sunʼiy intellekt texnologiyalarini joriy etish orqali odil sudlovga erishish darajasini oshirish hamda sud tizimining moddiy-texnik taʼminotini yaxshilashga doir qoʻshimcha chora-tadbirlar toʻgʻrisida»gi 140-sonli Prezident Farmoni va uning ahamiyati hususida soʻz yuritildi.

Taʼkidlanganidek, mazkur Farmon sud tizimida oshkoralik, shaffoflik va zamonaviy texnologiyalardan samarali foydalanishni taʼminlashga xizmat qiladi. Uchrashuvda sud faoliyatiga sunʼiy intellektni joriy etish orqali ish yuritishda tezkorlik va xolislikka erishish, fuqarolarning huquq va manfaatlarini samarali himoya qilish imkoniyatlari kengayayotgani alohida qayd etildi.

Mazkur uchrashuv davomida sud hujjatlarining ijrosini taʼminlash, xususan xususiy ajrimlarning toʻliq va oʻz vaqtida koʻrib chiqilishi yuzasidan masʼul tashkilotlar va mahalla rahbarlariga aniq vazifalar yuklatildi. Sud raisi R.Bekmuratova sud qarorlari ijrosini taʼminlashda har bir rahbar va fuqarolarning huquqiy ongi hamda javobgarligi muhim oʻrin tutishi, shu orqali jinoyatchilikni bartaraf etishda tizimli yondashuv shakllanishini taʼkidladi.

Uchrashuv yakunida, sud va mahalliy organlar oʻrtasida hamkorlikni yanada mustahkamlash, jamoatchilik ishtirokida huquqbuzarliklarning oldini olish boʻyicha aniq chora-tadbirlar belgilandi.

ADVOKATLAR BILAN UCHRASHUVDA OLIY SUD PLENUMI QARORLARI MUHOKAMA QILINDI

Qoraqalpogʻiston Respublikasi maʼmuriy sudi sudyalari R. Xudaybergenova va J. Aymaganbetovalar tomonidan  Advokatlar palatasi Qoraqalpogʻiston Respublikasi hududiy boshqarmasida advokatlar bilan uchrashuv tashkil etildi.

Uchrashuvning asosiy maqsadi — Oʻzbekiston Respublikasi Oliy sudi Plenumi tomonidan qabul qilingan ayrim muhim qarorlarning mazmunini advokatlarga tushuntirish boʻldi.

Sudyalar uchrashuv davomida Oliy sud Plenumining “Toʻlovga qobiliyatsizlik toʻgʻrisida”gi Oʻzbekiston Respublikasi Qonuni normalarini qoʻllashning ayrim masalalari toʻgʻrisida”gi 13-sonli qarorining ahamiyatiga toʻxtalib oʻtdilar.  Shuningdek, “Oʻzbekiston Respublikasi oliy sudi Plenumining “Dalillar maqbulligiga oid jinoyat-protsessual qonuni normalarini qoʻllashning ayrim masalalari toʻgʻrisida”gi 14-sonli, “Oila va xotin-qizlarni qoʻllab-quvvatlashga oid qonun hujjatlariga oʻzgartirish va qoʻshimchalar kiritilishi munosabati bilan Oliy sud Plenumining ayrim qarorlariga oʻzgartirish va qoʻshimchalar kiritish toʻgʻrisida»gi 15-sonli qarorilarining mazmuni haqida keng tushunchalar berildi.

Uchrashuv jarayonida advokatlar oʻzlarini qiziqtirgan savollarga huquqiy asoslangan javoblar oldilar.

MULKNI MUSODARA QILISH TARTIBI

Mulk huquqi shaxsning o‘ziga qarashli mol-mulkka o‘z xohishi bilan va o‘z manfaatlarini ko‘zlab egalik qilish, undan foydalanish va uni tasarruf etish, shuningdek o‘zining mulk huquqini, kim tomonidan bo‘lmasin, har qanday buzishni bartaraf etishni talab qilish huquqidan iborat. Mulk huquqi muddatsiz bo‘lib, mulk daxlsiz va qonun bilan muhofaza qilinadi.

Mulk egasining mol-mulkini olib qo‘yishga, shuningdek uning huquqlarini cheklashga faqat qonunda nazarda tutilgan hollarda gina yo‘l qo‘yiladi.

Shuningdek, qonunda nazarda tutilgan hollarda va tartibda mulkdorning majburiyatlari bo‘yicha undiruv ushbu mol-mulkka qaratilgan taqdirda, shuningdek, natsionalizatsiya qilish, rekvizitsiya va musodara qilish tartibida yo‘l qo‘yiladi.

Qonunda nazarda tutilgan hollarda mol-mulk sudning qaroriga muvofiq jinoyat yoki o‘zga huquqbuzarlik qilganlik uchun haq to‘lamasdan mulkdordan olib qo‘yilishi, ya’ni musodara qilinishi mumkin.

Davlat daromadiga o‘tkaziladigan mol-mulkni olib qo‘yish, hisobga olish, saqlash, baholash va sotish, shuningdek, uni yo‘q qilish O‘zbekiston Respublikasi Vazirlar Mahkamasining 2009 yil 15 iyuldagi 200-sonli qarori bilan tasdiqlangan «Davlat daromadiga o‘tkaziladigan mol-mulkni olib qo‘yish, sotish yoki yo‘q qilib tashlash tartibi to‘g’risida»gi Nizom asosida amalga oshiriladi.

Mulkni olib qo‘yish to‘g’risidagi materiallar qonunchilikda belgilangan tartibda va muddatlarda mol-mulkni davlat daromadiga o‘tkazish yoki uni yo‘q qilish to‘g’risida qaror qabul qiluvchi tegishli sudga yoki organga berilishi kerak. Bunda materialga mol-mulkni olib qo‘yish to‘g’risidagi bayonnoma, mol-mulkni saqlash uchun qabul qilish-topshirish dalolatnomasi, avtomototransport vositasi yoki ko‘chmas mulkni davlat daromadiga o‘tkazishda – ko‘zdan kechirish dalolatnomasi, 20 va undan ortiq yil foydalanilgan avtomototransport vositasini ko‘zdan kechirish dalolatnomasiga O‘zbekiston Respublikasi Ichki ishlar vazirligi Yo‘l harakati xavfsizligi davlat xizmati organining avtomototransport vositasining foydalanishga yaroqliligi to‘g’risidagi xulosasi, ekspertiza o‘tkazish uchun qismlar va namunalar olish to‘g’risidagi dalolatnoma, mol-mulkning iste’mol, foydalanish yoki qayta ishlash uchun yaroqliligi yoki yaroqsizligi bo‘yicha ekspert xulosasi, majburiy sertifikatlashtirilishi lozim bo‘lgan mahsulotga muvofiqlik sertifikati, mol-mulkni baholash to‘g’risidagi xulosa yoki mol-mulkni baholash to‘g’risidagi dalolatnoma, shuningdek bazaviy hisoblash miqdorining ikki yuz baravari va undan ortiq miqdoriga teng bo‘lgan mol-mulk bo‘yicha qo‘shimcha ravishda fotosuratga olish materiallari, mavjud bo‘lganda esa videotasvirga olish materiallari ham ilova qilinadi.

Mulkni davlat daromadiga o‘tkazish yoki uni yo‘q qilib tashlash to‘g’risida qaror qabul qilgan sud yoki boshqa organ o‘z qarorida ekspertiza o‘tkazishda (sertifikatlashda) olingan va qaytarilgan qismlar hamda namunalar sonini ko‘rsatgan holda davlat daromadiga o‘tkaziladigan yoki yo‘q qilib tashlanadigan mol-mulkning qiymati va miqdorini ko‘rsatadi.

Mulkni davlat daromadiga o‘tkazish yoki uni yo‘q qilib tashlash to‘g’risida qaror qabul qilgan sud yoki organ o‘zi chiqargan tegishli qaror kuchga kirganidan keyingi kundan kechiktirmay ijro hujjatini ijro etish uchun tegishli Byuro organiga yuboradi.

Vakolatli organning kuchga kirgan qarori, shuningdek, mol-mulkni davlat daromadiga o‘tkazish yoki mol-mulkni yo‘q qilish to‘g’risidagi sudning kuchga kirgan qarori asosida sud tomonidan beriladigan ijro varaqasi ijro hujjati hisoblanadi.

Sud yoki vakolatli organning ijro hujjatiga ushbu Nizomga asosan yuqorida qayd etilgan, ijroni yuritish uchun zarur bo‘lgan hujjatlar ilova qilinadi.

Mulkni sotishdan tushgan pul mablag’larining davlat daromadiga to‘liq va o‘z vaqtida tushishini nazorat qilish, shuningdek, davlat organlariga bepul berilgan mol-mulkni hisobga olish soliq organlari tomonidan amalga oshiriladi.

Mulkni olib qo‘yish, davlat mulkiga o‘tkazish yoki ularni yo‘q qilish, baholash (qayta baholash) hamda sotish vakolati berilgan, olingan pul mablag’larining O‘zbekiston Respublikasi Davlat byudjetiga to‘liq va o‘z vaqtida o‘tkazilishini ta’minlovchi davlat boshqaruvi, nazorat organlari va mansabdor shaxslar faoliyatining qonuniyligi ustidan nazoratni O‘zbekiston Respublikasi Bosh prokurori va unga bo‘ysunuvchi prokurorlar amalga oshiradi.

Nizom talablari buzilishining har bir holati bo‘yicha prokuratura organlari jazo muqarrarligini ta’minlaydi va qonunda nazarda tutilgan jinoiy javobgarlikkacha bo‘lgan javobgarlik choralarini ko‘radi.

Nizom talablari buzilganligi uchun aybdor bo‘lgan shaxslar qonunchilikda belgilangan tartibda javobgar bo‘ladi.

Spartak Niyazov,

Nukus tumanlararo iqtisodiy sudi raisi

ADOLAT TIZIMIDA YANGI BOSQICH: SUDLARDA SUN’IY INTELLEKT JORIY ETILADI

Yurtimizda sud-huquq sohasini isloh qilish, uni zamon talablariga mos ravishda takomillashtirish borasida izchil ishlar olib borilmoqda. Prezidentimizning joriy yil 21 avgustda qabul qilingan “Sudlar faoliyatiga sun’iy intellekt texnologiyalarini joriy etish va raqamlashtirish jarayonlarini jadallashtirish to‘g’risida”gi Farmoni (PF–140-son) ana shu sa’y-harakatlarning mantiqiy davomi bo‘ldi.

Farmonda sud faoliyatiga sun’iy intellekt (SI) texnologiyalarini joriy etish, raqamlashtirish jarayonlarini tezlashtirish hamda odil sudlovga bo‘lgan ishonchni mustahkamlash bo‘yicha aniq vazifalar belgilab berilgan.

Endilikda sun’iy intellekt imkoniyatlaridan foydalangan holda:

-sud ishlari tahlil qilinadi va ular yuzasidan qaror qabul qilishda yordam ko‘rsatiladi;

-huquqiy hujjatlarni tayyorlash jarayonlari avtomatlashtiriladi;

-fuqarolar sud qarorlarini oddiy va tushunarli tilda olish imkoniyatiga ega bo‘ladi;

elektron navbat, onlayn kuzatuv va raqamli murojaat imkoniyatlari keng joriy etiladi.

Bu o‘zgarishlar fuqarolarga o‘z huquq va manfaatlarini himoya qilishda katta qulaylik yaratishi, sud ishlarining samaradorligi va tezkorligini oshirishi kutilmoqda. Inson omili kamayadi, xolislik ortadi. Sud tizimida sun’iy intellektni tatbiq etish inson omilining ta’sirini kamaytirish, xolis va odil qaror qabul qilishga xizmat qiladi. Bu esa nafaqat fuqarolarning sudga ishonchini oshiradi, balki adolat sari qadamlarni yanada mustahkamlaydi.

Prezident Farmonida belgilangan vazifalar – sud-huquq sohasini raqamlashtirish va zamonaviy texnologiyalar asosida rivojlantirishga qaratilgan keng ko‘lamli islohotlarning yangi bosqichidir. Eng muhimi, ushbu islohotlar orqali xalq manfaati birinchi o‘ringa qo‘yiladi.

Raysa Bekmuratova,
Jinoyat ishlari bo‘yicha Kegeyli tumani sudi raisi

SUD TIZIMIDA SUN’IY INTELLEKT: ODIL SUDLOV SARI YANGI QADAM

2025 yil 21 avgust kuni O‘zbekiston Respublikasi Prezidenti tomonidan imzolangan “Sudlar faoliyatiga sun’iy intellekt texnologiyalarini joriy etish orqali odil sudlovga erishish darajasini oshirish hamda sud tizimining moddiy-texnik ta’minotini yaxshilashga doir qo‘shimcha chora-tadbirlar to‘g’risida” PF–140-sonli farmoni mamlakatda sud-huquq islohotlarining yangi bosqichini boshlab berdi. Unga muvofiq, sudlar faoliyatiga sun’iy intellekt texnologiyalarini joriy etish va “Raqamli sud” kontseptsiyasini amalga oshirish orqali odil sudlovga erishish darajasini yanada oshirish ko‘zda tutilgan.

Farmonda belgilangan asosiy vazifalardan biri — sud ishlarini to‘liq raqamlashtirishga qaratilgan “Raqamli sud” kontseptsiyasidir. Endi fuqarolik, ma’muriy va iqtisodiy ishlar bo‘yicha ariza, shikoyat va iltimosnomalar elektron shaklda qabul qilinadi. Ularning tahlili va saralanishi sun’iy intellekt orqali amalga oshiriladi.

Bunday yangiliklar sud ishlari samaradorligini oshirish bilan birga, sudlar ish yukini kamaytiradi, inson omili bilan bog’liq xato-xatolarning oldini oladi va eng muhimi — odil sudlovga tez va shaffof etishish imkoniyatini yaratadi.

Farmonda nazarda tutilgan texnologiyalar nafaqat ish yuritishni engillashtiradi, balki sud jarayonlarini sifat jihatidan o‘zgartiradi. Ya’ni:

Sud hujjatlarining loyihalari avtomatik shakllantiriladi;

Normativ-huquqiy hujjatlar sun’iy intellekt orqali tahlil etiladi;

Sud muhokamasining tahminiy natijasi va xarajatlari oldindan hisoblanadi. Bunday imkoniyatlar sud tizimining shaffofligi va xolisligini kuchaytirishga xizmat qilishi kutilmoqda.

Farmonda keltirilgan rejalarning amaliy ahamiyati shundaki, har bir chora-tadbir uchun aniq muddatlar belgilangan:

2025 yil 1 dekabrga qadar — fuqarolar, advokatlar va sudyalar uchun normativ-huquqiy hujjatlarni tahlil qiluvchi elektron platforma ishga tushiriladi.

2026 yil 1 yanvardan — “my.sud.uz” portalida sun’iy intellekt asosida ishlaydigan virtual maslahatchi faoliyati boshlanadi.

2026 yil 1 martdan — sud ishlari holati va ma’lumotlarini Yagona interaktiv davlat xizmatlari portali orqali olish imkoni yaratiladi.

Bu tadbirlar orqali fuqarolarning sud himoyasiga bo‘lgan ishonchi oshishi, murojaatlarga javob olishdagi shaffoflik va tezlikni ta’minlash rejalashtirilmoqda.

Farmon faqat texnologiyalarni joriy etish bilan cheklanmaydi. U sudya va xodimlar uchun munosib sharoit yaratish, raqamli savodxonlikni oshirish, kiber huquq sohasida kadrlar tayyorlash kabi muhim yo‘nalishlarni ham o‘z ichiga oladi.

Sud binolari ta’mirlanadi, moddiy-texnika bazasi yaxshilanadi. Sud xodimlari uchun zamonaviy ish shart-sharoitlari va ijtimoiy kafolatlar yaratilishi belgilangan.

Prezident tomonidan qabul qilingan PF–140-sonli farmon — O‘zbekistonda sud-huquq sohasini zamonaviy bosqichga olib chiqishga qaratilgan strategik qadamdir. Sun’iy intellekt va raqamlashtirish orqali odil sudlovni ta’minlash nafaqat islohot, balki jamiyatda ishonch va adolat muhitini shakllantirish vositasi sifatida namoyon bo‘lmoqda.

Texnologiya va inson omilini uyg’unlashtirgan bu islohotlar — sud tizimini xalq uchun ochiq, faol va ishonchli qilishda hal qiluvchi ahamiyatga ega.

Abilay ADILOV, 

Qoraqalpog’iston Respublikasi sudi raisining o‘rinbosari 

BAYRAMGA BAG‘ISHLANGAN TANTANALI TADBIR TASHKIL ETILDI

O‘zbekiston Respublikasi Mustaqilligining 34 yilligi munosabati bilan Oliy sudda tantanali bayram tadbiri bo‘lib o‘tdi.

Tadbir Davlat madhiyasi bilan boshlandi. Sud tizimi rahbarlari — Oliy sud raisi B.Islomov, Sudyalar oliy kengashi raisi X.Yodgorov va Sudyalar assotsiatsiyasi raisi U.Mingboev yig’ilganlarni bayram bilan tabriklab, mustaqillik xalqimizning erkin va farovon hayotga ishonchini mustahkamlayotganini ta’kidladilar.

So‘nggi yillarda sud-huquq sohasida keng ko‘lamli islohotlar amalga oshirildi. Sud faoliyati ochiq va odil bo‘lishi, sudyalar mustaqilligi ta’minlanishi, raqamli texnologiyalar joriy etilishiga katta e’tibor qaratilmoqda. Xususan, yaqinda Prezident tomonidan imzolangan farmonlar sud tizimida yangi bosqichni boshlab berdi.

Tadbirda bir guruh sud faxriylari va sud xodimlari «Benuqson xizmati uchun» ko‘krak nishoni bilan taqdirlandi. Ular orasida Qoraqalpog’iston Respublikasi ma’muriy sudi raisi Amir Nurlipesov ham bor.

Videokoferentsiya aloqa rejimida o‘tkazilgan tadbirda Qoraqalpog’iston Respublikasi sudi raisi K.Tarixov mazkur mukofotni o‘z egasiga tantanali ravishda topshirdi.

Bunday e’tibor va e’tirof sudya va xodimlarning o‘z ishini yanada samarali va mas’uliyat bilan bajarishiga katta motivatsiya bo‘ladi.

SUD-HUQUQ TIZIMIDA JINOYAT-IJROIYA QONUNCHILIGI BO‘YICHA AMALGA OSHIRILAYOTGAN ISLOHOTLAR

Oltinchi mintaqaviy hudud 2-son tergov hibsxonasi shaxsiy tarkibi ishtirokida “Sud-huquq tizimida jinoyat-ijroiya qonunchiligi bo‘yicha amalga oshirilayotgan islohotlar” mavzusida seminar tashkil etildi.

Tadbirda jinoyat ishlari bo‘yicha Taqiatosh tumani sudi raisi L.Otegenova ishtirok etib, sud tizimini liberallashtirish, uning mustaqilligini ta’minlash, qonun ustuvorligini qaror toptirish hamda inson huquqlarini himoya qilish borasida mamlakatimizda amalga oshirilayotgan tub islohotlar yuzasidan atroflicha ma’lumot berdi.  Sudya tomonidan, dastlabki tergov bosqichida sud nazoratini kuchaytirish, fuqarolarning huquq va erkinliklarini kafolatlashga qaratilgan qonunchilikdagi o‘zgarishlar xususida ham atroflicha fikr-mulohazalar bildirildi.

Shuningdek, seminarda 2025-yil 21-avgust kuni O‘zbekiston Respublikasi Prezidentining imzosi bilan qabul qilingan ikki muhim farmon-“Sudlar faoliyatiga sun’iy intellekt texnologiyalarini joriy etish orqali odil sudlov darajasini oshirish hamda sud tizimining moddiy-texnik ta’minotini yaxshilashga doir chora-tadbirlar”, “Odil sudlov sohasida yuqori malakali kadrlar tayyorlash tizimini takomillashtirish chora-tadbirlari” mazmun-mohiyati bo‘yicha huquqiy tushunchalar berildi.

Mazkur tadbir xodimlarning huquqiy savodxonligini oshirish, jinoyat-ijroiya tizimidagi islohotlarni amaliyotga tatbiq etishda muhim ahamiyat kasb etadi.

SOHA VAKILLARI ISHTIROKIDA SEMINAR O’TKAZILDI

Qoraqalpog’iston Respublikasi sudi jinoyat ishlari bo‘yicha sudlov hay’ati raisi A.Adilov rahbarligida Respublika Ichki ishlar vazirligida seminar tashkil etildi.

Tadbirda jinoyat ishlari bo‘yicha shahar va tuman sudlari raislari, tergov sudyalari hamda tergovchilar ishtirok etishdi.

Seminarda asosiy e’tibor ma’muriy huquqbuzarlik to‘g’risidagi ishlarini rasmiylashtirish jarayonida yo‘l qo‘yilayotgan xatolar va kamchiliklarni tahlil qilish, ularni bartaraf etish hamda kelgusidagi vazifalarni belgilashga qaratildi.

 Qoraqalpog’iston Respublikasi sudi jinoyat ishlari bo‘yicha sudlov hay’ati raisi A.Adilov o‘z nutqida, ma’muriy huquqbuzarlik to‘g’risidagi ishlarini to‘g’ri va aniq rasmiylashtirish nafaqat fuqarolarning huquq va manfaatlarini ta’minlash, balki adolatli sudlovni amalga oshirishda ham muhim o‘rin tutishini ta’kidladi.

Ushbu muloqot amaliyotdagi muammolarni muhokama qilish va qonun ustuvorligini ta’minlashda muhim ahamiyat kasb etdi.