HÁKIMSHILIK SUDLARDA FOTO SUWRETKE ALÍW HÁMDE VIDEO JAZÍWǴA ALÍW TÁRTIBI
Ózbekstan Respublikası Hákimshilik sud islerin júritiw haqqındaǵı Kodekstiń 143-statyasına muwapıq, hákimshilik sud islerin júritiw qatnasıwshıları hám sud májilisi zalında qatnasıwshılar jazba jazıwlar júrgiziw, stenogramma júrgiziw hám dawıs jazıp alıw huqıqına iye. Sud májilisiniń foto súwretine, videojazıwına, sonday-aq radio hám televidenie arqalı translyaciya qılınıwına isti kórip atırǵan sudtıń ruxsatı menen jol qoyıladı.
Sud dodalawınıń ashıqlıǵın, sudlar iskerligine baylanıslı málimleme alıw huqıqın ámelge asırılıwınıń, sonday aq, sudlar tárepinen usı máselege baylanıslı nızam hújjetleriniń birdey qollanılıwın támiyinlew maqsetinde Ózbekstan Respublikası Joqarı sudı plenumı tárepinen 2020-jıl 21-fevral kúni 4-sanlı «Sud dodalawınıń ashıqlıǵın hám sudlardıń iskerligine baylanıslı málimleme alıw huqıqın támiyinlew haqqında»ǵı qararı qabıl etilip, qarardıń 14-bántine kɵre, nızamǵa muwapıq:
a) ashıq sud májilisin fotosúwretke túsiriw, videojazıwǵa alıw, sonday-aq, ǵalaba xabar qurallarında translyaciya etiwge tómendegi tártipte jol qoyıladı:
puqaralıq isin kóriw waqtında – sud májilisinde basshılıq etiwshiniń táreplerdiń razılıǵı alınǵannan keyin bergen ruqsatı menen;
jınayat, hákimshilik, ekonomikalıq isti hám hákimshilik huqıqbuzarlıq haqqındaǵı isti kóriw waqtında – sud májilisinde basshılıq etiwshiniń táreplerdiń pikirin tıńlaǵannan keyin bergen ruqsatı menen;
b) ashıq sud májilisinde audiojazıwdı ámelge asırıwǵa tómendegi tártipte jol qoyıladı:
puqaralıq isin kóriw waqtında – sud májilisinde basshılıq etiwshiniń táreplerdiń razılıǵı alınǵannan keyin berilgen ruqsatı menen;
jınayat isi hám hákimshilik huqıqbuzarlıq haqqındaǵı isti kóriw waqtında – sud májilisinde basshılıq etiwshiniń táreplerdiń pikirin tıńlaǵannan keyin bergen ruqsatı menen.
Sudlardıń itibarı sud májilisi zalında qatnasıp atırǵanlar hár qanday is boyınsha erkin túrde jazba jazıwlar júrgiziwi, stenogramma júrgiziwi, ekonomikalıq is yamasa hákimshilik huqıqıy qatnasıqlardan kelip shıqqan is kórilip atırǵanda bolsa, sonday-aq, audiojazıw júrgiziwi múmkin ekenligine qaratıw lazımlıǵı haqqında túsindirmeler berilgen.
Process qatnasıwshılarınıń iltimasnamaların, ǵalaba xabar quralları wákilleriniń múrájatların qanaatlandırıw yamasa qanaatlandırmastan qaldırıw haqqında sud ornında uyǵarıw shıǵaradı hám sud májilisiniń bayannamasına kirgizedi.
Sud ǵalaba xabar quralları wákillerin tarqatılıp atırǵan xabardıń durıslıǵı, haqıyqatlılıǵı, qalıslıǵı hám isenimliligi ushın juwapkershilik haqqında eskertedi hám bul haqqında sud májilisiniń bayannamasına jazıp qoyıladı.
Sud májilisiniń barısın nızamda jol qoyılǵan kóriniste jazıp alınıwın ámelge asırıp atırǵan shaxslardıń háreketi sud májilisi tártibine kesent etpewi kerek.
Sud májilisinde qatnasıp atırǵan hám onıń barısın jazıp alıw huqıqınan paydalanıp atırǵan shaxslar tárepinen bul huqıqtıń paydalanıwı sud májilisi tártibiniń buzılıwı bolıp tabıladı. Bunday jaǵdayda sud ayıpdar shaxslarǵa processual nızamda názerde tutılǵan tásir ilajların qollanıwǵa haqılı.
Janat AYMAGANBETOVA,
Qaraqalpaqstan Respublikası hákimshilik sudı sudyası