SUD SISTEMASÍNDA HADALLÍQ – ÁHMIYETLI PRINCIP
Ózbekstan Respublikası Joqarǵı sudı baslıǵı tárepinen 2025-jıl 8-noyabr kúni tastıyıqlanǵan media-rejeniń orınlanıwın támiyinlew maqsetinde Qaraqalpaqstan Respublikası hákimshilik sudında ruwxıy-aǵartıwshılıq ilaj ótkerildi.
Ilaj sheńberinde birinshi márte sudyalıq lawazımına tayınlanǵan sudyalar hám xızmetkerler menen korrupciyaǵa baylanıslı jınayatlardıń aldın alıw, hár qanday korrupciyalıq jaǵdaylarǵa jol qoymaw máselelerine baǵıshlanǵan ashıq pikirlesiw shólkemlestirildi. Ushırasıwdıń ózgwswhligi, oǵan sudyalar hám sud xızmetkerleriniń ata-anaları da mirát etildi. Bul bolsa sud sistemasında hadallıq, páklik hám juwapkershilik principlerin tek ǵana xızmet babında emes, al shańaraqlıq ortalıq arqalı da bekkemlewge qaratılǵan qatnas ekenin kórsetedi.
Ashıq pikirlesiw dawamında sud sistemasında korrupciyaǵa qarsı gúresiw boyınsha ámelge asırılıp atırǵan izbe-iz reformalar, profilaktikalıq ilajlar haqqında hár tárepleme pikir alısıldı. Atap ótilgenindey, sudya hám sud xızmetkeriniń hár bir qararı, hár bir háreketi jámiyettiń ádil sudlawǵa bolǵan isenimi menen tikkeley baylanıslı.
Sonday-aq, ushırasıwda sudlar iskerliginde ashıq-aydınlıqtı támiyinlew, nızam ústinligin ámelde engiziw, korrupciyaǵa mawasasız qatnastı qáliplestiriw búgingi kúnniń eń áhmiyetli talaplarınan biri ekeni ayrıqsha atap ótildi.
Korrupciyaǵa qarsı keskin hám sistemalı gúres sud sistemasınıń abırayın hám ádillik principlerin bekkemlewde sheshiwshi faktor ekenine ayrıqsha itibar qaratıldı.
Bunday ilajlar sudyalar hám sud xızmetkerleriniń huqıqıy sanasın, kásiplik juwapkershiligin hám ruwxıy immunitetin jáne de kúsheytiwge xızmet etip, jámiyette ádil sudlawǵa bolǵan isenimdi arttırıwda áhmiyetli.