Dawa arza mápi gózlengen dawagerge jiberilmegenligi dawa arzanı qaytarıw ushın tiykar bolmaydı

Dawa arza mápi gózlengen dawagerge jiberilmegenligi dawa arzanı qaytarıw ushın tiykar bolmaydı

Ózbekstan sawda-sanaat palatası aymaqlıq basqarması “SS” AJ mápinde, juwapker “MTP” JShJnen 277.549.000 swm qarızdarlıǵın óndiriwdi sorap dawa arza menen ekonomikalıq sudına múrájat etken.
Rayonlar aralıq ekonomikalıq sudınıń uyǵarıwı menen dawa arza Ózbekstan Respublikası Ekonomikalıq processual kodeksiniń 155-statyasınıń birinshi bólimi 5-bándine tiykar yaǵnıy, dawa arza dawagerge jiberilgenligin tastıyıqlawshı hújjet usınılmaǵanlıǵı sebepli qaytarılǵan.
Ekonomikalıq processual kodeksiniń 150-statyası birinshi bólimine tiykar dawager dawa arza menen múrájat etkende juwapkerge hám úshinshi shaxslarǵa dawa arzasınıń hám oǵan qosımsha qılınǵan, usı shaxslarda bolmaǵan hújjetlerdiń kóshirme nusqaları jiberiliwi kerek.
Ekonomikalıq processual kodeksiniń 155-statyasınıń birinshi bólimi 5-bándinde, juwapkerge hám úshinshi shaxslarǵa dawa arzanıń hámde oǵan qosımsha qılınǵan hújjetlerdiń kóshirmeleri jiberilgenligin, ápiwayılastırılǵan is júritiw tártibinde kórip shıǵılatuǵın isler boyınsha bolsa, juwapkerge dawa arzasınıń hám oǵan qosımsha qılınǵan hújjetlerdiń kóshirmeleri tapsırılǵanlıǵın tastıyıqlawshı dáliyller usınılmaǵan bolsa, sudya dawa arzanı hám oǵan qosımsha qılınǵan hújjetlerdi dawagerge qaytaradı dep kórsetilgen.
Biraq, sudya dawa arza dawagerge jiberilgenligin tastıyıqlawshı hújjet usınılmaǵanlıǵına tiykarlanıp dawa arzanı nadurıs qaytarǵan.
Sebebi, dawa arzanı mápi gózlengen dawagerge jiberiliwi kerekligi haqqındaǵı norma Ekonomikalıq processual Kodekste de názerde tutılmaǵan.

Qaraqalpaqstan Respublikası
sudınıń sudyası    Utkirjon Sabirov

HAYАL-QÍZLAR TURMÍS DÁREJESIN JAQSÍLAW MÁMLEKETIMIZ SIYАSATÍNÍŃ TIYKARǴÍ JÓNELISLERINIŃ BIRI

Xalqımız, hayal-qızlar turmıs dárejesi hám sıpatın asırıw máselesi mámleketimiz siyasatınıń tiykarǵı jónelisleriniń birine aylanbaqta.

Prezidentimiz Sh.M.Mirziyoev mámleketlik xızmetker kárxana- shólkem baslıqları xızmet xanasında otırmastan, ápiwayı puqaralar menen ashıq sáwbetlesiwler ótkerip olardıń qıynap kiyatırǵan másele hám mashqalaların úyrenip olardıń sheshimin tabıw ilajların kóriw, puqaralardıń bugingi turmısınan razı bolıp jasawdı támiyinlew kerek ekenligin atap ótken edi.

Usı tiykarda, Nókis rayonlar aralıq hákimshilik sudınıń sudyası J.Aymaganbetova tárepinen joqarıda atap ótilgen máseleler boyınsha Ellikqala rayonı aymaǵında jasawshı “Hayallar dápteri”ne kirgizilgen huqıqıy járdemge mútáj hayal-qızlar menen ashıq sáwbetlesiwler ótkerildi. Olardı qıynap kiyatırǵan másele hám mashqalaları úyrenilip, tiyisliligi boyınsha huqıqıy túsinikler berildi.

Kóshpeli sud májlisi

Qanlıkól rayonı Mámleketlik xizmetler orayı imaratıda kóshpeli sud májlisi bolıp ótti.

Kóshpeli sud májlisinde jınayat isleri boyınsha Xojeli rayonı sudınıń baslıǵı I.Allaniyazov tárepinen sanitariya qaǵıydaları, suw hám suwdan paydalanıw hámde avtomobil transportında jolawshılardı licenziyasız tasıw tarawındaǵı huqıqbuzardıqlar boyınsha huqıqbuzıwshı qatarında iske tartılǵan 25 puqaranıń qarsısına toplanǵan hákimshilik isi kórip shıǵıldı hámde huqıqbuzıwshılarǵa Ózbekstan Respublikası HJhKniń tiyisli statyaları menen jaza sharası tayınlandı.

Sonday-aq, usı aymaq turǵınları qatnasında jınayatshılıq hám huqıqbuzarlıqtıń aldın alıw baǵdarında islenip atırǵan jumıslar haqqında, ózin-ózin basqarıw organları menen birgelikte orınlarda jınayatshılıq hám xwqıqbuzarlıqtıń aldın alıwǵa qaratılǵan jámiet qáwipsizligi hám jámiyet tártibine qarsı jınayatlar hám adam sawdası jınayatına qarsı gúresiw hám onıń aqıbetleri, kelip shıǵıw sebepleri haqqında hám onıń aldın alıw boyınsha keńnen túsinik berip ótti.

Eki jıl múddetke azatlıqtı sheklew jazası tayınlandı

Jınayat isleri boyınsha Ellikqala rayon sudı baslıǵı O.Maulenov tárepinen 2021 jıl 13 sentyabr kúni Ellikkala rayonı “Navoiy” mákan puqaralar jıyınında kóshpeli sud májilisi ótkerildi. Kóshpeli sud májilisinde Ózbekstan Respublikası Jınayat kodeksiniń 210-statyası yaǵnıy para alıu jınayatı menen ayıplanǵan D.Dnıń qarsısına qozǵatılǵan jınayat isi kórip shıǵıldı. Is halatına kóre sudlanıwshı D.D. rayonlıq mádeniyat úyi baslıǵı lawazımında islep júrip óz xızmet wazıypasınan qastan paydalanıp, usı mekemede islewshi O.K. nı 0,5 stavka aylıq is haqısın 1 stavkaǵa ózgertip beriw esesine 1.mln.300.mıń. sum para pulların tanısı B.A. arqalı alǵan waqtında ayǵaqlı zatlar menen qolǵa alınǵan.

Kóshpeli sud májilisinde D.Dnıń aldın sudlanbaǵanlıǵı, islegen qılmısınan shın kewilden pushayman bolǵanlıǵı esapqa alınıp, oǵan úsh jıl múddetke belgili huqıqlardan ayırıw menen birge, eki jıl múddetke azatlıqtı sheklew jazası tayınlandı.

Jınayat isleri boyınsha

Ellikqala rayonı sudı baslıǵı           Orazbay Mawlenov

Minnetlemeler minnetleme shártlerine hám nızam hújjetleri talaplarına muwapıq lazım dárejede orınlanbasa nızamda belgilengen tártipte juwapkershilikke tartıwǵa sebep boladı

Dawager Ózbekstan Respublikası mámleketlik aktivlerin basqarıw Agentliginiń Qaraqalpaqstan Respublikası basqarması juwapker “K N” juwapkershiligi sheklengen jámiyetiniń qarsısına dawa arza menen múrájat etip, juwapkerden 6 016 000 swm penya óndiriwdi soraǵan.

Birinshi instanciya sudınıń 2021-jıl 1-iyul kúngi hal qılıw qararı menen dawa arza qısman qanaatlandırılıp, juwapkerden dawagerdiń paydasına 1 203 200 swm penya óndirilgen, dawanıń qalǵan bólegi qanaatlandırıwsız qaldırılǵan.

Hal qılıw qararına narazı bolıp juwapker apellyaciya tártibinde arza bergen.
Iste anıqlanǵan jaǵdaylarǵa qaraǵanda, tárepler ortasında 2019-jıl 5-noyabr kúni Xojeli rayonı Sarıshungil APJ aymaǵında jaylasqan “Suw bólistiriw qurılmasına investiciya kirgiziw shárti menen satıp alıw tuwrısında aldı-sattı shártnaması dúzilgen. Shártnamaǵa tiykar juwapker bir jıl múddet ishinde 150 000 000 swmlıq investiciya kirgiziw hám palız ónimlerin jetistiriwge qániygelestirilgen teplica jumısın shólkemlestiriw minnetlemesin alǵan.

Shártnamanıń 2-qosımshasına tiykar juwapker 2019 jıldıń 4 shereginde 10 000 000 swm, 2020 jıldıń 1 hám 2 shereginde 45 000 000 swmnan, 2020 jıldıń 3 shereginde 50 000 000 swm investiciya kirgiziwi lazım bolǵan bolsa da, 10 000 000 swmlıq minnetlemesi 397 kúnge, 90 000 000 swmlıq minnetlemesi 123 kúnge keshiktirip orınlanǵan.

Shártnamanıń 5.6-bántine tiykar investiciya minnetlemeleri orınlanbaǵan jaǵdayda juwapker keshiktirilgen hár bir kún ushın orınlanbaǵan investiciya minnetlemesiniń 0,04 payızı muǵdarında, biraq keshiktirilgen investiciya minnetlemeleri muǵdarınıń 50 payızınan aspaǵan halda penya tólew minnetlemesin alǵan.
Sonlıqtan dawager tárepinen 6 016 000 swm penya esaplanǵan. Birinshi instanciya sudı juwapkerdiń múlkiy awhalın itibarǵa alıp, talap etilgen penyanı 1 203 200 swmǵa kemeytirgen.

Ózbekstan Respublikası Puqaralıq kodeksiniń 333-statyasına muwapıq, qarızdar ayıbı bolǵan jaǵdayda minnetlemeni orınlamaǵan yaki lazım dárejede orınlamaǵanı ushın eger Nızam hújjetlerinde yaki shártnamada basqasha tártip belgilenbegen bolsa, juwap beredi.

Juwapker apellyaciyalıq arzasında mámleketimizde koronovirus infekciyası (COVID-19) tarqalıwınıń aldın-alıwǵa qaratılǵan ilajlar engizilgenligi sebepli tiyisli minnetlemelerin orınlawdı keshiktirgenligin sebep etip kórsetken. Biraq, istegi anıqlanǵan jaǵdaylarǵa qaraǵanda juwapker 10 000 000 swmlıq minnetlemesin 2019 jıldıń 31 dekabr kúnine, 45 000 000 swmlıq minnetlemesin 2020 jıldıń birinshi shereginde orınlawı lazım bolsa da, bul minnetlemelerdi tek ǵana 2021 jıl yanvar ayında orınlaǵan.

Apellyaciya instanciya sudı juwapker shártnama minnetlemelerin orınlawdı mámleketimizde koronovirus infekciyası (COVID-19) tarqalıwınıń aldın-alıwǵa qaratılǵan ilajlar engizilmesten aldın keshiktirgenligi sebepli onı juwapkershilikten azat etiwge tiykar joq dep esaplap, birinshi instanciya sudınıń hal qılıw qararın ózgerissiz qaldırıw haqqında sheshim qabıllaǵan.

Qaraqalpaqstan Respublikası sudı
ekonomikalıq isleri boyınsha
sudlaw quramı sudyası Gawhar Zaripova

Solidar juwapkershilik

Solidar juwapkershilik bir neshe qarızdardıń minnetlemesine tiyisli puqaralıq juwapkershilik bolıp esaplanadı. Solidar juwapkershilik penen baylanıslı túsinikler Ózbekstan Respublikası Puqaralıq kodeksiniń 252-255-statyalarında óz kórinisin tapqan.

Eger, karızdarlar sherik bolıp minnetleme alǵanında kreditor hámme qarızdarlardan minnetlemeni solidar orınlawdı da, olardıń hár birinen óz aldına orınlawdı da, sonıń menen birge, qarızdı tolıq yaki onıń bir bólegin tólewdi de talap etiwge haqılı.

Solidar qarızdarlardıń birinen tolıq qanaatlanbaǵan kreditor ala almaǵan nársesin basqalarınan talap etiw huqıqına iye. Solidar qarızdarlar minnetleme tolıq orınlanbaǵanǵa shekem minnetli bolıp qala beredi. Solidar minnetlemeniń qarızdarlardan biri tárepinen tolıq orınlanıwı qalǵan qarızdarlardı minnetlemeden azat etedi.
Eger nızamlarda yaki shártnamalarda basqasha tártip belgilep qoyılǵan bolmasa, solidar minnetlemeni orınlaǵan qarızdar óz úlesin shegirip taslap, basqa qarızdarlarǵa teń úleslerde regress talabın qoyıw huqıqına iye boladı.

Ekonomikalıq sudlarında kóbinese kepillik shártnamasına tiykar solidar juwapkershilik penen baylanıslı isler kóriledi. Mısalı, Ózbekstan Sawda-sanaat Palatası Qaraqalpaqstan Respublikası basqarması dawager AK “Mikrokreditbank” mápin qorǵap, juwapker “MM” JShJ hám qosımsha juwapker “MO” JShJdan 600 000 000 swm tiykarǵı kredit qarızdarlıq, 46 500 000 swm payızın solidar tártipte óndiriwdi, óndiriwdi qosımsha juwapker “MO” JShJǵa tiyisli girewdegi múlklerge qaratıwdı, girewdegi múlklerdiń kim-zıyat sawdasında satılıw bahasın belgilep beriwdi soraǵan.

Istegi anıqlanǵan jaǵdaylarǵa qaraǵanda, tárepler ortasında 2020-jıl 09-iyul kúni 111-sanlı kredit shártnaması dúzilgen. Kredit shártnamasına tiykar bank filialı “MM” JShJne qurılıs materialların satıp alıwı ushın jıllıq 21 payız tólew shárti menen, 36 ay múddetke 600 000 000 swm muǵdarında kredit ajıratqan.
Ajıratılǵan kredittiń qaytarılıwına “MO” JShJ kepil bolıp tárepler ortasında 2019-jıl 09-iyul kúni kepillik shártnaması dúzilgen.

Sonday-aq, 2020 jıl 13 iyul kúngi girew shártnamasına tiykar “MO” JShJne tiyisli Moynaq rayonı, Jiemuratov kóshesi nomersiz jayda jaylasqan tábiyiy gaz kompressorı hám kompyuter kolonkası girewge koyılǵan.
“MM” JShJ kredit shártnamasında belgilengen minnetlemelerin orınlamay, kredit hám oǵan esaplanǵan payızların tólemegenligi sebepli Ózbekstan Sawda-sanaat Palatası Qaraqalpaqstan Respublikası basqarması banktiń mápinde sudqa dawa arza menen múrájat etken.

Kepillik shártnamasına tiykar kepil, kredit shártnaması boyınsha “MM” JShJniń barlıq minnetlemeleriniń orınlanıwı boyınsha bank aldında shaqırıp alınbaytuǵın tárizde hám sózsiz juwap beriw minnetlemesin alǵan.
Sonlıqtan birinshi instanciya sudınıń 2021 jıl 26 may kúngi hal qılıw qararı menen dawa arza talapları qısman qanaatlandırılıp, “MM” JShJ sud májlisine shekem payızınan 17 600 000 swm tólegenligin itibarǵa alıp, “MM” JShJ hám “MO” JShJnen banktiń paydasına solidar tártipte 600 000 000 swm kredit qarızı, 28 900 000 swm payızın óndiriwdi, óndiriwdi girewdegi mal-múlkke qaratıwdı, bunnan tısqarı isti kóriw nátiyjesi menen 12 930 000 swm mámleketlik bajı puldı “MM” JShJ hám “MO” JShJnen solidar tártipte byudjetke óndiriwdi lazım tapqan.

Qaraqalpaqstan Respublikası
sudı sudyası Gawhar Zaripova

Qamsızlandırıw shártnaması

Qamsızlandırıw puqara yaki yuridik shaxstıń (qamsızlanıwshı) qamsızlandırıw shólkemi menen (qamsızlandırıwshı) menen dúzetuǵın múlkiy yaki jeke múlkiy qamsızlandırıw shártnamaları tiykarında ámelge asırıladı.

Qamsızlandırıw shártnaması jazba túrde dúziliwi lazım. Bul talapqa ámel qılmaslıq shártnamanıń haqıyqıy sanalmaslıǵına sebep boladı.
Qamsızlandırıw shártnamasınıń tárepleriniń biri (qamsızlanıwshı) qatnasıq uqıplılıǵına iye bolǵan fizikalıq yaki yuridik shaxs, ekinshi tárep (qamsızlandırıwshı) bolsa kommerciyalıq shólkem esaplanǵan hám tiyisli túrdegi qamsızlandırıwdı ámelge asırıwǵa licenziyası bolǵan yuridik shaxslar bolıwı múmkin.
Múlkiy qamsızlandırıw shártnamasına muwapıq qamsızlandırıwshı qamsızlandırıw hádiysesi júz bergende qamsızlanıwshıǵa bul hádiyse aqıbetinde qamsızlandırılǵan múlkke jetkerilgen ziyandı yamasa qamsızlanıwshınıń basqa múlkiy mápleri menen baylanıslı ziyandı shártnamada belgilengen summa sheńberinde tólew minnetlemesin aladı.

Múlkiy qamsızlandırıw shártnaması boyınsha tómendegiler qamsızlandırılıwı múmkin:
mal-múlktiń joytılıwı (nabıt bolıwı), kemis shıǵıwı yaki ziyanlanıwı qáwpi;
puqaralıq juwapkershiligi qáwpi-basqa shaxslardıń ómiri, den- sawlıǵı yaki mal-múlkine ziyan keltiriliwi aqıbetinde júzege keletuǵın minnetlemeler boyınsha juwapkershilik, nızamda názerde tutılǵan jaǵdaylarda bolsa, sonday-aq shártnamalar boyınsha juwapkershilik qáwpi;
isbilermenlik qáwpi- isbilermenniń kontragentleriniń óz minnetlemelerin buzıwı yaki isbilermenge baylanıslı bolmaǵan jaǵdaylarǵa kóre bul iskerlik shárt-shárayatlarınıń ózgeriwi sebepli isbilermenlik iskerliginen kútilgen dáramatların ala almaslıq qáwpi.

múlkiy qamsızlandırıw shártnamasın dúziwde qamsızlanıwshı menen qamsızlandırıwshı ortasında tómendegilerge erisiliwi lazım:

qamsızlandırıw obekti bolǵan belgili bir mal-múlk yamasa basqa múlkiy máp tuwrısında;
qamsızlandırıw pulınıń muǵdarı tuwrısında;

qamsızlandırıw tólemi muǵdarın anıqlaw tártibi tuwrısında, eger shártnamada onı qamsızlandırıw pulınan az muǵdarda tólew múmkinshiligi názerde tutılǵan bolsa;

qamsızlandırıw sıylıǵınıń muǵdarı hám onı tólew múddeti (múddetleri) tuwrısında;
shártnamanıń ámel qılıw múddeti tuwrısında.

Basqa túrdegi shártnamalardan parıqlı túrde, qamsızlandırıw shártnaması belgisiz múddetke dúziliwi múmkin emes.

Qamsızlandırıw shártnamasınıń ámel qılınıwınıń baslanıwı Ózbekstan Respublikası Puqaralıq kodeksiniń 947-statyasınıń birinshi bóliminde belgilengen.

Oǵan muwapıq, qamsızlandırıw shártnaması, eger onda basqasha tártip názerde tutılmaǵan bolsa, qamsızlandırıw sıylıǵı yaki birinshi tólem tólengen payıttan kúshke kiredi hám onıń shártleri, eger shártnamada qamsızlandırıw ámel qılıwı baslanıwınıń basqasha múddeti názerde tutılmaǵan bolsa, qamsızlandırıw shártnaması kúshke kirgennen keyin júz bergen qamsızlandırıw hádiyselerine qollanıladı.
Eger qamsızlandırıw shártnaması minnetleme orınlanıwınıń támiynatı sıpatında dúzilgen bolsa, tiykarǵı minnetleme orınlanbaǵan jaǵdayda kreditor qamsızlandırıwshıdan qamsızlandırıw pulın tólewdi talap etiw huqıqına iye boladı.

Eger qamsızlandırıw shártnaması xojalıq shártnaması boyınsha minnetlemeler orınlanıwınıń támiynatı sıpatında dúzilgen bolsa, qamsızlandırıwshıǵa talap bildirilgenge shekem kreditor qarızdardan qarızın óndiriw sharaların kóriwi zárúr hám tek qarızdardıń minnetlemesin orınlaw ushın mal-múlki jeterli bolmaǵanında kreditor qamsızlandırıwshıǵa talap bildiriw huqıqına iye, eger qamsızlandırıw shártnamasında basqasha tártip belgilenbegen bolsa.

Qarızdardıń mal-múlkiniń minnetlemeni orınlaw ushın jeterli emesligi mámleket orınlashısınıń orınlaw hújjetin Ózbekstan Respublikasınıń «Sud hújjetleri hám basqa organlar hújjetlerin orınlaw haqqında»ǵı Nızamınıń 40-statyasınıń birinshi bólimi 3-bándine tiykar óndiriwshige qaytarıw haqqındaǵı qararı menen tastıyıqlanadı.
Usı orında bir mısal. AK «Xamkorbank» tárepinen 2017 jıl 28 iyul kúngi kredit shártnamasına tiykar «D» jeke menshik turaq jay iyeleri sherikligine qurılıs-ońlaw jumısların ámelge asırıwı ushın 60 ay múddetke, jılına 14 payız tólew shárti menen 300 000 000 swm muǵdarında kredit ajıratılǵan. Kredittiń waqtında qaytarılıwın támiyinlew maqsetinde bank, sheriklik hám qamsızlandırıw kompaniyası ortasında 2017 jıl 11 avgust kúni «kreditti qamsızlandırıw shártnaması» dúzilgen hám usı kúni qamsızlandırıw polisi berilgen.

Turaq jay iyeleri sherikligi kredit qarızın tólew múddetlerin keshiktirgeni ushın bank kredit shártnamasın múddetinen burın biykar etip, turaq jay iyeleri sherikliginen 249 354 238 swm kredit qarızı, 75 742 670 swm esaplanǵan payızı hám 3 278 365 swm penya óndiriwdi sorap sudqa dawa arza menen múrájat etken. Birinshi instanciya sudınıń 2020 jıl 7 fevral kúngi hal qılıw qararı menen dawa arza qısman qanaatlandırılǵan, turaq jay iyeleri sherikliginen banktiń paydasına 239 627 374,66 swm kredit qarızı, 74 742 670 swm payızı, 3 278 365 swm penya óndirilgen. Sudtıń hal qılıw qararına tiykar berilgen orınlaw xat mámleket orınlawshısınıń 2020 jıl 03 iyul kúngi qararı menen Ózbekstan Respublikasınıń «Sud hújjetleri hám basqa organlar hújjetlerin orınlaw haqqında»ǵı Nızamınıń 40-statyasınıń birinshi bólimi 3-bándine tiykar óndiriwshige qaytarılǵan. Sonlıqtan AK «Xamkorbank» sudqa dawa arza menen múrájat etip, qamsızlandırıw kompaniyasınan turaq jay iyeleri sherikliginiń tólew imkaniyatı bolmaǵan 233 927 809,03 swm tiykarǵı qarızın, 114 539 158,27 swm payızın hám 21 826 699,15 swm penyanı óndiriwdi soraǵan.

Birinshi instanciya sudınıń 2021 jıl 19 iyul kúngi hal qılıw qararı menen dawa arza qısman qanaatlandırılǵan. Qamsızlandırıw kompaniyasınan AK «Xamkorbank» paydasına 233 927 809,03 swm qamsızlandırıw pulı óndirilgen, dawa talaplarınıń qalǵan bólegi qanaatlandırıwsız qaldırılǵan.
Iste anıqlanǵan jaǵdaylarǵa qaraǵanda, qamsızlandırıw shártnamasınıń 1.11-bándine tiykar qamsızlandırıwshı qamsızlandırıw hádiysesi nátiyjesinde qamsızlanıwshıǵa qarız alıwshı tárepinen kredittiń tiykarǵı bólimi (kreditten paydalanǵanlıq payızlardan tısqarı) qaytarılmaǵanlıǵı boyınsha kórilgen ziyandı qaplaw minnetlemesin alǵan. Qamsızlandırıw shártnamasınıń 3.1-bándinde usı shártnama boyınsha qamsızlandırıw pulı 300 000 000 swmdı, yaǵnıy ajıratılǵan kredit bahasınıń 100 payızın quraǵan.
Is sudta kórilgen waqıtta qaytarılmaǵan kredit qarızınıń muǵdarı 233 927 809,03 swmdı quraytuǵınlıǵı, qamsızlandırıw kompaniyası payız, penyadan payda bolǵan qarızlardı tólew minnetlemesin almaǵanlıǵı, kredit alıwshı turaq jay iyeleri sherikliginiń kredit qarızın tólew imkaniyatı joqlıǵı, bul tiyisli tártipte mámleket orınlawshısınıń qararı menen tastıyıqlanatuǵınlıǵı anıqlanǵan. Apellyaciya instanciya sudınıń qararı menen hal qılıw qararı ózgerissiz qaldırılǵan.

Qaraqalpaqstan Respublikası sudınıń
ekonomikalıq isleri boyınsha
sudlaw quramı sudyası            Gawhar Zaripova

Ijara shártnamasi

Ijara shártnama tiykarında jerge, basqa tábiyǵıy resurslarǵa, sonday-aq xojalıq jumısın hám ózge jumıstı ǵárezsiz ráwishte ámelge asırıw ushın ijarashıǵa zárúr bolǵan múlkke haq esesine múddetli iyelik etiw hám onnan pydalanıwdan ibárat bolıp esaplanadı.

Ijara Ózbekstan Respublikası nızam hújjetlerinde qadaǵan etilmegen jumıstıń bárshe tarawında múlkshiliktiń bárshe forması hám túrindegi mal-múlkke qarata qollanılıwı múmkin.
Ijara qatnasıqları ijara haqqındaǵı Nızam hám Ózbekstan Respublikasınıń basqa nızam hújjetleri menen tártipke salınadı.

Tómendegiler yaǵnıy kárxanalar, ayrım islep shıǵarıwlar, cexlar, fermalar, basqa bólinbeler, ayrım imáratlar, úskeneler, transport quralları, inventarlar, ásbaplar, basqa materiallıq baylıqlar, jer (awıl xojalıǵı ushın ajıratılatuǵın jerler tek ǵana awıl xojalıq ónimlerin jetilistiriw ushın beriledi) hám basqa tábiyǵıy resurslar ijára qatnasıqlarınıń obektleri bolıwı múmkin, al mal-múlk iyesi yaki ol wákil qılǵan keńsesi, sonıń menen birge shet el yuridik hám fizikalıq shaxsları mal-múlkti ijaraǵa beriw huqıqına iye bolǵan ijaraǵa beriwshi, yuridiklıq hám fizikalıq shaxslar, sonıń menen birge sovet hám shet el yuridiklıq shaxsları qatnasındaǵı qospa kárxanalar, xalıq aralıq birlespeler hám shólkemler, sonday-aq, shet el mámleketleri, xalıq aralıq shólkemler ijara qatnasıqlarınıń subektleri bolıwı múmkin. Bunda shet el yuridikalıq hám fizikalıq shaxslardıń mámleket múlkin ijaraǵa alıwdaǵı qatnasıwı Ózbekstan Respublikası nızamları menen tártipke salınadı.
Táreplerdiń ıxtıyariylıǵı hám tolıq teń huqıqlıǵı tiykarında málim múddetke duziletuǵın ijara shártnaması ijara qatnasıqlarınıń júzege keliwine tiykar boladı.

Ijaraǵa berilip atırılǵan mámleket múlkiniń baxası Ózbekstan Respublikasınıń nızamlarına tiykar belgilenedi, al ijarǵa berilip atırılǵan mámleketke tiyisli bolmaǵan múlktiń baxasın múlkdar baрalaydı.
Ijaraǵa beriwshi ijarashıǵa mal-múlkti ol qaysı maqsetke mólsherlegen bolsa, soǵan say jaǵdayda yaki shártnamada kózde tutılǵan jaǵdayda tapsırıwı shárt.

Ózbekstan Respublikası nızamlarında hám ijara shártnamasında basqa shártler kózde tutılmaǵan bolsa, ijarashı ijaraǵa alınǵan mal-múlkti, jer hám basqa tábiyǵıy resurslardan tısqarı, ijaraǵa beriwshiniń ruxsatı menen ekilemshi ijaraǵa tapsırıwǵa haqılı esaplanadı. Bunda ijaraǵa alıwshı shártnamaǵa muwapıq ijaraǵa beriwshi aldında juwapker bolıp qala beredi.

Ózbekstan Respublikası Puqaralıq Kodeksinde múlk ijara shártnaması, prokat shártnaması, transport quralın ijaraǵa beriw shártnaması, imárat yaki qurılıstı ijaraǵa beriw shártnaması hámde kárxananı ijaraǵa beriw shártnaması boyınsha túsinikler berilgen.

Múlk ijara shártnaması boyınsha ijaraǵa beriwshi ijaraǵa alıwshıǵa haq esesine mal-múlkke waqtınsha iyelik etiw hám paydalanıw yaki paydalanıw ushın tapsırıw minnetlemesin aladı.

Prokat shártnaması boyınsha turaqlı isbilermenlik jumısı sıpatında mal-múlkti ijaraǵa beriwshi haq esesine ijaraǵa alıwshıǵa waqtınsha iyelik etiw hám paydalanıw ushın kósher mal-múlkti tapsırıw minnetlemesin aladı.

Transport quralın ekipajı menen ijaraǵa beriw shártnaması boyınsha ijaraǵa beriwshi transport quralın waqtınsha iyelik etiw hám paydalanıw ushın haq esesine ijaraǵa alıwshıǵa beredi hám óz kúshi menen onı basqarıw hámde texnik paydalanıw boyınsha xızmet kórsetedi, al transport quralın ekipajsız ijaraǵa beriw shártnaması boyınsha ijaraǵa beriwshi transport quralın basqarıw hám texnik paydalanıw boyınsha xızmet kórsetpegen jaǵdayda waqtınsha iyelik etiw hám paydalanıw ushın ijaraǵa alıwshıǵa haq esesine beredi.

Zamir Berdimuratov

Shımbay rayonlar aralıq ekonomikalıq sudı baslıǵı

«Las Vegas»taǵı mushı zorlar

Kewlimjay (atlar ózgertilgen) náwbettegi kewil ashar otırıspaqlardıń biri janjel menen juwmaqlanıwın qıyalına da keltirmegen edi. Óziniń eń jaqın jorası Abbaz hám Jálmen menen birge Nókistegi endiǵana kópke tanılıp atırǵan «Las Vegas» restoranına barıp awqatlanadı. Ózi bayramnıń qabatı emespe, azıraq awzına tiygennen keyin «bizde qızlardı 8-mart bayramı menen qutlıqlayıq» dep Kewlimjay tórde restorandaǵı miymanlardıń kewilli dem alıwı ushın túrli muzıkalardı qoyıp otırǵan Baxıttıń qasına keledi. Ári-beri mikrofonıńdı ber, bizler tilek aytajaqpız dep «didjey» Baxıttıń qolındaǵı mikrofonǵa asıladı. Bunday jaǵday birinshi emes, sonlıqtan bunday awhalǵa úyrenip ketken didjeyshi elestirmey miymanlarǵa mikrofondı tekǵana restoran hákimshiliginiń ruxsatı menen alıwǵa bolatuǵınlıǵın aytadı. Biraq há degennen bunday juwaptı kútpegen Kewlimjay bolsa ashıw menen didjeydiń betine «salıp» qaldı. Jaǵdaydı kórgen joraları Abbaz benen Jálmen de waqıya ornına jetip kelip, tóbeleske aralasıp ketti.

Kim urdı, kim tayaq jedi, kim juwapker, kim jábirkesh… Qattı shawqım, tóbeles ishinde «iyt iyesin tanımaydı».

Qarańǵılıq.

Suw sepkendey tınıshlıq.

Sud zalı.

«Mushı zor» jigitler temir tor ishinde.

Didjey Baxıt bolsa emlewxanada. Restorandaǵı qılmısları ushın Kewlimjay, Abbaz hám Jálmenlerge Ózbekstan Respublikası Jınayat kodeksi tiyisli statyaları menen 2 jıl múddetke azatlıqtı sheklew jazası tayınlandı.

Sudlanıwshılardıń azatlıqtan sheklew jazasın ótew mánzili etip – Nókis qalasındaǵı olar jasaytuǵın úyleri belgilendi. Sonday-aq, keshki saat 20:00 den azanǵı saat 06:00 ge shekem jasaw ornınan shıqpaw, kafe, bar, restoran hám basqada kewil ashar orınlarǵa barmaw, spirtli ishimlikler ishpew, Nókis qalası IIO probaciya toparınıń rásmiy ruxsatısız hám razılıǵısız jasaw jerin ózgertpewi hám administrativlik territoriya aymaǵınan sırtqa shıqpaw sheklewleri ornatıldı. Jáne hár ayda keminde bir mártebe Nókis qalası IIO probaciya toparınan esaptan ótip turıw májbúriyatı júklendi.

Solay eken, oylamay basılǵan hár bir qádemniń juwabı bar. Jınayat ushın bolsa jaza…

Jınayat isleri boyınsha

Nókis qalası sudı sudyası        Maqset Bekimbetov