SANLI SUD: NIZAM ÚSTINLIGINE ZAMANAGÓY JANTASÍW
Shımbay rayonındaǵı «Doslıq» mákan puqaralar jıyınında aymaq turǵınla penen ushırasıw ótkerildi. Ilajǵa Shımbay rayonlararalıq ekonomikalıq sudınıń baslıǵı B.Bekmuratov hám jınayat isleri boyınsha Shımbay rayonı sudınıń tergew sudyası R.Kaukishev qatnastı.
Ushırasıwda sudyalar tárepinen puqaralarǵa Prezidentimizdiń 2025-jıl 21-avgustta qabıl etilgen «Sudlardıń jumısına jasalma intellekt texnologiyaların engiziw arqalı ádil sudlawǵa erisiw dárejesin arttırıw hám sud sistemasınıń materiallıq-texnikalıq támiynatın jaqsılawǵa baylanıslı ilajlar haqqında»ǵı PP-140-sanlı Pármanı jáne «Ádil sudlaw tarawında joqarı mamanlıqtaǵı kadrlar tayarlaw sistemasın túp-tiykarınan jetilistiriw ilajları haqqında»ǵı PP-141 sanlı Pármanınıń mazmun-mánisi keńnen túsindirip berildi.
Atap ótilgenindey, Prezidentimizdiń usı jıl 21-avgusttaǵı PP-140-sanlı Pármanı sud sistemasında sanlastırıwdı jańa basqıshqa alıp shıqtı. Usı pármanǵa bola, endi sud islerin elektron tárizde júrgiziw imkaniyatları keńeytiledi, jasalma intellekt tiykarında isleytuǵın tallaw platformaları engizilip, «aqıllı sud zalları» hám onlayn múrájat sistemaları keń kólemde jumıs baslaydı, sud qararlarınıń ashıq-aydınlıǵın támiyinlew ushın ashıq maǵlıwmatlar bazası jaratıladı.
Sonday-aq, puqaralar ushın sudlarǵa múrájat etiw, jumıslardı baqlaw hám qararlar menen tanısıw procesi biraz jeńillestiriledi.
Joqarıda atap ótilgen pármanlar arqalı sud sistemasında jańa basqısh baslanbaqta. Atap aytqanda, jasalma intellekt texnologiyalarınıń engiziliwi, sud imaratlarınıń materiallıq-texnikalıq támiynatınıń jaqsılanıwı, sudyalardıń mamanlıǵı arttırılıwı puqaralardıń ádil sudlawǵa bolǵan isenimin bekkemleydi.
Ilaj dawamında qatnasıwshılar ózlerin qızıqtırǵan sorawlarǵa juwap aldı.