ÁMUDÁRYA RAYONÍNDA KORRUPCIYAǴA QARSÍ GÚRES BOYÍNSHA USHÍRASÍW HÁM KÓSHPELI SUD MÁJILISI ÓTKERILDI
Jınayat isleri boyınsha Ámiwdárya rayonı sudınıń tergew sudyası D.Yusupova tárepinen rayondaǵı «Gúlzar» mákan puqaralar jıyını imaratında aymaq turǵınlarınıń qatnasıwında ushırasıw hám kóshpeli sud májilisi shólkemlestirildi.
Ilaj Ózbekstan Respublikası Prezidentiniń «Korrupciyaǵa qarsı mawasasız múnásibette bolıw ortalıǵın jaratıw, mámleketlik hám jámiyetlik basqarıwda korrupciyalıq faktorlardı keskin azaytıw hám onda jámiyetshiliktiń qatnasın keńeytiw ilajları haqqında»ǵı Pármanınıń áhmiyetin túsindiriwge baǵıshlandı.
Ushırasıwda tergew sudyası tárepinen puqaralarǵa «Korrupciyaǵa qarsı gúresiw haqqında»ǵı Nızamnıń mazmun-mánisi, maqset hám wazıypaları haqqında tolıq maǵlıwmat berildi. Atap ótilgenindey, bul Nızam korrupciyaǵa qarsı gúresiw tarawındaǵı huqıqıy qatnasıqlardı tártipke salıw, mámleketlik uyımlar hám puqaralıq jámiyeti institutlarınıń birge islesiwin bekkemlew, sonday-aq, xalıqtıń huqıqıy mádeniyatın arttırıwǵa qaratılǵan.
Ilaj dawamında korrupciyaǵa qarsı gúresiwdiń tiykarǵı principleri – nızamlılıq, puqaralar huqıqlarınıń ústinligi, ashıq-aydınlıq, mámleket hám jámiyettiń birge islesiwi, profilaktikalıq ilajlardıń nátiyjeliligi, juwapkershiliktiń sózsizligi sıyaqlı máselelerge ayrıqsha itibar qaratıldı.
Ózbekstan Respublikası Hákimshilik juwapkershilik haqqındaǵı kodekstiń 183-statyası (maydabiyzarılıq) boyınsha 9 shaxsqa qarata is kórip shıǵılıp, olardan 5 shaxsqa hákimshilik qamaq, 4 shaxsqa hákimshilik járiyma jazası tayınlandı.
Sonday-aq, 59-2-statya 2-bólimi (shańaraqlıq zorlıq), 41-statya (aqıretlew) hám 52-statya 2-bólimi (jeńil dene jaraqatın jetkeriw) boyınsha da is materialları kórip shıǵılıp, nızamlı jaza sharaları tayınlandı.
