KÓSHPELI SUD – SERGEKLIKKE SHAQÍRADÍ
Huqıqbuzarlıqqa qarsı gúres – jámiyettiń tınıshlıǵı hám rawajlanıwı ushın tiykarǵı faktorlardan biri. Sebebi adamlardıń tınısh hám abadan turmıs keshiriwi, bárinen burın, nızam ústinligi hám jámiyetlik tártiptiń támiyinleniwine baylanıslı.
Áyne usı maqsette, sońǵı jılları elimizde máhállelerde ótkerilip atırǵan kóshpeli sud májilisleri keń jámiyetshiliktiń itibarın tartpaqta. Sebebi bul sud processleri xalıqqa tek ǵana nızamlı shara kóriw emes, al profilaktikalıq jumıslardıń nátiyjeliligin asırıwda úlken áhmiyetke iye.
Usınday kóshpeli sud májilisleriniń náwbettegisi Beruniy rayonındaǵı «Bostan» mákan puqaralar jıyınında ótkerildi. Onda jınayat isleri boyınsha Beruniy rayonı sudınıń tergew sudyası Ibrayım Allaniyazov alıp bardı. Onda Ózbekstan Respublikası Hákimshilik juwapkershilik haqqındaǵı kodekske muwapıq, hár qıylı huqıqbuzarlıqlar islegen 14 shaxstıń isi kórip shıǵıldı.
Sud processinde ayıbın tán alıp, islegen qılmısına shın kewilden pushaymanlıq bildirgen shaxslarǵa eskertiw hám járiyma tayınlandı. Biraq óz qılmısın tolıq ańlap jetpegen huqıqbuzarlarǵa nızamshılıqta názerde tutılǵan qatań jaza ilajları qollanıldı.
Sud májilisi dawamında tek ǵana huqıqbuzarlıqlar menen baylanıslı isler kórilip qoymastan, máhálle turǵınlarınıń qatnasıwında huqıqıy túsindiriwk jumısları da alıp barıldı. Turǵınlar, ásirese, jaslar, nızam aldında hár kim juwapker ekenin hám hár qanday huqıqbuzarlıq jazaǵa sebep bolıwı múmkin ekenin óz kózi menen kórip, ańlap jetti.
Bunday ashıq kóshpeli sudlar – sergeklik sabaǵı. Ol tek ǵana nızambuzıwshıǵa tiyisli shara belgilep qoymastan, al basqalarǵa da sabaq bolıp xızmet etedi. Eń tiykarǵısı – puqaralarda huqıqıy mádeniyattı arttırıwǵa, máhállelerde tınıshlıq hám tatıwlıqtı bekkemlewge xızmet etedi.