JASLARDÍŃ QATNASÍWÍNDA ASHIQ SUD MÁJILISI BOLIP ÓTKERILDI
Berdaq atındaǵı Qaraqalpaq mámleketlik universitetinde kóshpeli ashıq sud májilisi bolıp ótti.
Onda fakultet dekanları, dekan orınbasarları, tyutorlar hám student-jaslar qatnastı. Májilis aldınan universitettiń Jaslar máselesi hám ruwxıy-aǵartıwshılıq isleri boyınsha prorektorı S.Alawatdinov shıǵıp sóylep, búgingi kúnde jaslar arasında ushırasıp atırǵan unamsız illetler, ásirese jaslar tárepinen islenip atırǵan jınayatlar hám olardıń aldın alıw boyınsha islenip atırǵan jumıslar haqqında sóz etti.
Sonıń menen birge, jaslar arasında jınayashılıqtı azaytıw ushın ámelge asırılıp atırǵan profilaktikalıq ilajlar, tálim-tárbiya jumısları hám huqıqıy úgit-násiyatlawlardıń áhmiyetine toqtap ótildi. Jánede, studentlerdiń ruwxıy-ádep-ikramlılıq tárbiyasın bekkemlew, jınayatshılıqtıń aldın alıwda jaslardıń belsendiligin arttırıw zárúrligine itibar qaratıldı.
Bunnan soń, jınayat isleri boyınsha Nókis qalası sudınıń tergew sudyaları R.Nazarov hám D.Srajatdinovlar tárepinen ashıq kóshpeli sud májilisi ótkerildi. Sudyalar tárepinen hár bir kórilgen ashıq kóshpeli sud májilisi haqqında júz bergen jınayattıń huqıqıy aqıbetleri jóninde túsinik berildi.
Orınlarda keń jámiyetshiliktiń qatnasıwında ótkerilip atırǵan bunday ashıq sud májilisinlerinen gózlengen maqset jınayat islegen adamdı hámmege tanıstırıp, masqara etiw emes, al aramızda bolıp atırǵan waqıya-hádiyselerge biyparwa bolmay, eger qandayda bir nızambuzıwshılıq yaki huqıqbuzarlıq jaǵdayları júz berse dárhál tiyisli organlarǵa xabar berip, júz beriwi múmkin bolǵan kewilsiz jaǵdaydıń aldın alıwǵa shaqırıw bolıp tabıladı.