ÁMELIY SABAQ SHÓLKEMLESTIRILDI
Nókis rayonlar aralıq hákimshilik sudınıń baslıǵı R.Jumabaev Kegeyli rayonındaǵı 5-sanlı mektepte oqıwshılar mene ushırasıp, ámeliy sabaq ótti.
Maqset-jaslardıń huqıqıy bilimlerin jetilistiriw hám huqıqbuzarlıqlardıń aldın alıw. Onda sud baslıǵı “Hákimshilik huqıqbuzarlıqlar hám jaza túrleri” degen temada bayanat jasadı. Sonıń menen birge, 2025-jıl 6-fevralda qabıl etilgen «Jas óspirimler arasında huqıqbuzarlıqlar profilaktikası sistemasınıń jetilistiriliwi múnásibeti menen Ózbekstan Respublikasınıń Hákimshilik juwapkershilik haqqındaǵı kodeksine ózgerisler kirgiziw haqqında»ǵı Ózbekstan Respublikasınıń nızamı menen jaqınnan tanıstırdı. Bul nızam jas óspirimler arasında huqıqbuzarlıqlardıń aldın alıw hám profilaktikasın kúsheytiw, sonday-aq, tiyisli uyımlardıń wákilliklerin anıq belgilew arqalı sistemanı jetilistiriwde áhmiyetli ekenligi túsindirildi.
Álbette, jaslardıń huqıqıy bilimlerin bekkemlewde taraw wakilleri qatnasıwında ótkerilip atırǵan ámeliy sabaqlar oǵada úlken áhmiyetke iye. Bul, óz gezeginde, huqıqıy sistema hám nızamshılıqtıń anıq hám ayqın túrde túsindiriliwin támiyinleydi, sonday-aq, jaslardı nızamlarǵa húrmet ruwhında tárbiyalawda da ayrıqsha rol atqaradı.