PUQARALÍQ ISLERI BOYÍNSHA NÓKIS RAYONLARARALÍQ SUDÍNDA SUDYALAR SANÍ JÁNE BIREWGE KÓBEYDI
Kópshilikke málim, Qaraqalpaqstan Respublikasında xalıq sanı, sonıń menen birge fizikalıq hám yuridikalıq shaxslar arasında dawlı máselelerdiń de jıldan-jılǵa artıp baratırǵanlıǵı sebepli ayırım puqaralıq isleri boyınsha sudlardıń is júrgiziwindegi islerdiń sanı da keskin artıwına tiykar bolmaqta. Bul óz-ózinen sudyalar arasında is kóleminiń artıwı menen birge, belgili dárejede isti sapalı kórip, ádil qarar shıǵarıwınada keri tásirin tiygizetuǵınlıǵı bar gáp.
Eger anıq sanlarǵa múrájat etetuǵın bolsaq, puqaralıq isleri boyınsha Nókis rayonlararalıq sudında búgingi kúnde 5 sudya jumıs alıp barıp atırǵan bolsa da, 2023-jılı jámi 17 454 is (8.818 is, 8.636 sud buyrıǵı) kórilgen bolıp, bir sudyanıń ortasha aylıq jumıs kólemi 291 isti quraǵan, al 2024-jılı jámi 26.203 is (9.758 is, 16.445 sud buyrıǵı) kórilgen, sonnan bir sudyanıń ortasha aylıq jumıs kólemi 436,7 isti qurap, bul kórsetkish aldınǵı jılǵa salıstırǵanda 8.749 ǵa yamasa 50,1 procentke kóbeygen.
Mine usılar esapqa alınıp, Qaraqalpaqstan Respublikası sudı tárepinen ádil sudlaw nátiyjeliligin asırıw hám sudlar iskerligin elede jaqsılaw maqsetinde Ózbekstan Respublikası Joqarǵı sudına hám Ózbekstan Respublikası Sudyalar joqarı keńesine puqaralıq isleri boyınsha Ámiwdárya rayonı sudındaǵı bir sudya hám bir sudya járdemshisi shtat birliklerin puqaralıq isleri boyınsha Nókis rayonlararalıq sudına ótkeriw haqqında usınıs kiritilgen edi.
Bul baslama qollap-quwatlanıp, 2025-jıldıń 1-martınan baslap puqaralıq isleri boyınsha Ámiwdárya rayonı sudındaǵı bir sudya hám bir sudya járdemshisi shtat birlikleri puqaralıq isleri boyınsha Nókis rayonlararalıq sudına ótkerildi.
Usı tiykarda, “Sudlar haqqında”ǵı Ózbekstan Respublikası Nızamınıń 69-statyası hámde “Qaraqalpaqstan Respublikası Joqarǵı Keńesiniń Reglamenti haqqında”ǵı Qaraqalpaqstan Respublikası Nızamınıń 41-statyasına muwapıq Qaraqalpaqstan Respublikası Joqarǵı Keńesiniń 2025-jıl 26-fevral kúngi Prezidium qararı menen Bazarbaeva Zebo Baxadirovna sudyalıq wákilligi múddeti dáwirine Qaraqalpaqstan Respublikası puqaralıq isleri boyınsha Nókis rayonlararalıq sudınıń sudyası lawazımına tayınlandı.
Qaraqalpaqstan Respublikası sudınıń málimleme xızmeti