SUD HÚJJETLERIN ORÍNLAWDAǴÍ MASHQALALAR HÁM OLARDÍ SAPLASTÍRÍW MÁSELELERI DODALANDÍ
Qaraqalpaqstan Respublikası sudında sudyalar hám Májbúriy orınlaw byurosı Qaraqalpaqstan Respublikası basqarmasınıń juwapker xızmetkerleri, byuronıń qalalıq hám rayonlıq bólimleri baslıqlarınıń qatnasıwında “Sud hújjetleriniń orınlanıwın bunnan bılay da jaqsılaw, orınlaw barısında júzege kelip atırǵan mashqalalar hám olardı saplastırıw máseleleri” atamasında qospa májilis bolıp ótti.
Májilisti Qaraqalpaqstan Respublikası sudınıń baslıǵı K.Tarixov kiris sóz benen ashıp, mámleketimizde sud hújjetleri hám basqa uyımlardıń hújjetlerin orınlaw sisteması jıldan-jılǵa jetilistirilip atırǵanlıǵın, sudlar Májbúriy orınlaw byurosı menen birgelikte sud qararlarınıń orınlanıwın támiyinlep, puqara hám mákemelerdiń huqıqları menen nızamlı máplerin isenimli qorǵaw boyınsha keń kólemli ilajlar ámelge asırılıp atırǵanlıǵın atap ótti.
Sud hújjetleriniń orınlawın óz múddetinde hám tolıq orınlawǵa erisiw maqsetinde, usı tarawda ele ámelge asırılıwı tiyis bolǵan bir qatar jumıslar, sheshimin kútip turǵan mashqalalardıń bar ekenligi, olardı saplastırıw máselelerin keń túrde dodalap, tiyisli wazıypalardı belgilep alıw lazımlıǵına itibar qaratıldı.
Bayanatshılardıń atap ótkenindey, ayırım sud hám Májbúriy orınlaw byuroları arasında birge islesiw jeterli dárejede jolǵa qoyılmaǵanlıǵı sebepli sud qararlarınıń orınlawı sezilerli dárejede kemeyip ketken. Jumısshı topar tárepinen úyreniwler nátiyjesinde, Májbúriy orınlaw byuroları is júrgiziwindegi qaldıq orınlaw hújjetleri boyınsha sudlar hám rayonlar kesiminde orınlaw kórsetkishi tómen jaǵdayda ekenligi sınǵa alındı.
“Sud hújjetleri hám basqa uyımlardıń hújjetlerin orınlaw haqqında”ǵı Ózbekstan Respublikasınıń Nızamında bul boyınsha nızamshılıq tiykarları anıq kórsetip berilgen. Atap aytqanda, usı Nızamnıń 3-statyasında orınlaw uyımları hám onıń wákillikleri kórsetilgen bolıp, oǵan bola sud hújjetleri hám basqa uyımlardıń hújjetlerin májbúriy orınlaw Ózbekstan Respublikası Bas prokuraturası janındaǵı Májbúriy orınlay byurosı uyımlarınıń mámleketlik orınlawshılarına júklenip, olardıń wákillikleri usı Nızam hám basqa nızamshılıq hújjetleri menen belgilenedi.
Sonday-aq, usı Nızamnıń 30-statyasında májbúriy orınlaw múddetleri kórsetilgen. Sudyalar tárepinen áyne sud hújjetleri orınlanıwın támiyinlewde jol qoyılıp atırǵan múddet buzılıw jaǵdayları hám onda ushırasıp atırǵan mashqalalar taraw qánigeleri menen birgelikte keń túrde talqılanıp, aldaǵı waqıtları bul baǵdarda tıǵız birge islesiw boyınsha anıq wazıypalar belgilendi.
