SUD HÚJJETLERINIŃ ORINLANIWIN JEDELLESTIRIW MÁSELELERI TALQILANDI
Nókis rayonlararalıq ekonomikalıq sudınıń baslıǵı S.Niyazov tárepinen Májbúriy orınlaw byurosı Nókis qalalıq bóliminde taraw xızmetkerleri menen ushırasıw ótkerildi.
Onda tiykarınan Májbúriy orınlaw byurosı uyımlarında qaldıqta turǵan orınlaw hújjetleriniń orınlanıwın jedellestiriw máseleleri talqılandı.
Atap ótilgenindey, 2024-jıldıń birinshi yarımı dawamında Májbúriy orınlaw byurosı uyımlarına jiberilgen orınlaw hújjetlerin úyreniw barısında, búgingi kúnde byuronıń Nókis qalalıq bólimi is júrgiziwinde 397 orınlaw hújjeti orınlanbay atırǵanlıǵı málim boldı.
Ózbekstan Respublikasınıń “Sud hújjetleri hám basqa uyımlardıń hújjetlerin orınlaw haqqındaǵı”ǵı Nızamınıń 30-statyasına muwapıq, orınlaw háreketleri hám hújjetiniń talapları, olardıń ıqtıyarıy orınlanıwı ushın belgilengen múddet juwmaqlanǵan kúnnen baslap eki ay ishinde mámleketlik orınlawshı tárepinen ámelge asırılıwı hám orınlanıwı kerekligi belgilengen. Joqarıdaǵılar tiykarında, kóp waqıtlardan berli orınlanıwı támiyinlenbegen usı hújjetlerdiń orınlanıwın baqlawǵa alǵan halda, tez kúnlerde orınlaw ilajların kóriw kerekligi, keleshekte orınlaw hújjetleriniń Nızamda belgilengen múddetlerde orınlanıwın támiyinlew hám ámelde juwmaqlanǵan, biraq elektron maǵlıwmatlar bazası arqalı nátiyjesi texnikalıq sebeplerge baylanıslı kórinbey turǵan orınlaw hújjetleri boyınsha májbúriy orınlaw byurosınıń qararların pochta yaki basqa da baylanıs tarmaqları arqalı jiberiw kerekligi atap ótildi. Májbúriy orınlaw byurosı Nókis qalalıq bólimi is júrgiziwindegi 397 orınlaw hújjetiniń orınlanıwın támiyinlew boyınsha Nókis rayonlararalıq ekonomikalıq sudı menen birge islesiw boyınsha wazıypalar belgilendi.
Ushırasıwda mámleketlik orınlawshılar tarawda orınlaw háreketlerin ámelge asırıwdaǵı ayırım máseleler boyınsha ózleriniń qızıqtırǵan sorawlarına juwap aldı.