QARAQALPAQSTAN REPUBLIKASI SUDLARINIŃ 2024-2026 JILLARǴA MÓLSHERLENGEN JAŃA JÁMÁÁTLIK SHÁRTNAMASI TASTIYIQLANDÍ
Búgin Qaraqalpaqstan Respublikası sudında ulıwma yurisdikciya sudları hám hákimshilik sudlarınıń barlıq sudyaları hám sud xızmetkerleriniń qatnasıwında miynet jámáátiniń ulıwma májilisi videokoferenc baylanıs rejiminde ótkerildi.
Onda kún tártibindegi tiykarǵı másele Qaraqalpaqstan Respublikası sudınıń 2021-2023 jıllarǵa mólsherlengen jámáátlik shártnaması boyınsha islengen jumıslar haqqındaǵı esabatlardı tıńlaw hám Qaraqalpaqstan Republikası sudlarınıń 2024-2026 jıllarǵa belgilengen jańa jámáátlik shártnamasın tastıyqlawdan ibarat boldı.
Májilisti Qaraqalpaqstan Respublikası sudı baslıǵı K.Tarixov kiris sózi menen ashtı hám kún tártibindegi másele boyınsha sózge shıǵıp, aldınǵı Qaraqalpaqstan Respublikası sudınıń 2021-2023 jıllarǵa mólsherlengen jámáátlik shártnamasınıń múddeti pitkenligin, sonday-aq bul arada Ózbekstan Respublikası Miynet kodeksi jańa redakciyada qabıl etilip, miynet nızamshılıǵına bir qatar ózgeris hám qosımshalar kirgizilgenligin, sonlıqtan da jańa jámáátlik shártnamanı dúziw zárúrligi payda bolǵanlıǵın aytıp ótti.
Bunnan soń, Qaraqalpaqstan Respublikası sudlarınıń kásiplik awqamı komiteti baslıǵı Z.Babadjanovanıń aldınǵı jámáátlik shártnama boyınsha bir qansha jumıslar ámelge asırılǵanlıǵın, miynet iskerligi dawamında jámáátlik shártnamaǵa tolıq ámel etilgenligin, jámáátlik shártnamaǵa qayshı keletuǵın waqıyalar bolmaǵanlıǵın hámde islengen jumıslar boyınsha esabat bayanatı tıńlandı.
Esabatlar tolıq tıńlanıp bolınǵannan soń, basshılıq etiwshi Qaraqalpaqstan Republikası sudlarınıń 2024-2026 jıllarǵa mólsherlengen jámáátlik shártnaması joybarı táreplerge usınılǵanlıǵın hámde tiyisli tártipke kórip shıǵılǵanlıǵın bildirip, jámáátlik shártnama boyınsha májilis qatnasıwshılarınıń pikir hám usınısların tıńlap, jańa jámáátlik shártnaması joybarın dawısqa qoydı.
Miynet jámááti tolıq dawıs beriw jolı menen jańa jámáátlik shártnamasın tastıyıqladı.
