Sudyalar tárepinen Kegeylide seminar ótkerildi
Búgingi kúnde sudlar tárepinen salıq dawları boyınsha kórilip atırǵan islerdiń tiykarǵı kategoriyasın salıq qarızdarlıǵın óndiriw, salıq tólewshilerdiń byudjetten pul summaların qaytarıw, salıq uyımlarınıń qararların haqıyqıy emes dep tabıw, lawazımlı shaxslardıń is-háreketleri (háreketsizligi) ústinen shaǵım etiw haqqındaǵı dawlar quramaqta.
Qaraqalpaqstan Respublikası sudı sudyaları Z.Babadjanova, S.Niyazov, Qaraqalpaqstan Respublikası hákimshilik sudı sudyası R.Xudaybergenovalar tárepinen Kegeyli rayonındaǵı Mámleketlik salıq inspekciyasında ótkerilgen seminarda sudlarda kórip shıǵılıp atırǵan salıq dawlarına baylanıslı ayırım máseleler boyınsha birden-bir jantasıwdı qáliplestiriw zárúrligi júzege kelgenligi aytıldı. Mine usınnan kelip shıǵıp, Joqarǵı sud plenumınıń “Sudlar tárepinen salıq nızamshılıǵın qollawdıń ayırım máseleleri haqqında”ǵı qararı islep shıǵılǵanlıǵı hám onı ámeliyatda eń zárúr dep esaplanǵan máseleler boyınsha qollaw júzesinen usınıslar orın alǵanlıǵı ayrıqsha atap ótildi.
Iláj barısında sud ámeliyatınan kelip shıqqan halda salıq organları tárepinen salıq tekseriwleri nátiyjeleri boyınsha qararlar qabıl etiwde jol qoyılıp atırǵan nızam buzılıw jaǵdayları, salıqtı esaplaw, finanslıq járiyma hám jeńilliklerdi qollaw hám salıq organlarınıń qararaları tiykarında salıqlardı óndiriwdegi qáteliklerge baylanıslı áhmiyetli máseleler boyınsha túsinikler berildi.
Seminarda qatnasıwshılar qızıqtırǵan sorawlarına anıq juwaplar aldı.
Qaraqalpaqstan Respublikası sudı