QMUda “Joqarı oqıw ornı Korrupciyasız taraw” atamasında taraw qánigeleri menen ushırasıw bolıp ótti

Berdaq atındaǵı Qaraqalpaq mámleketlik universitetinde “Joqarı oqıw ornı-Korrupciyasız taraw” atamasında taraw qánigeleri menen ushırasıw bolıp ótti. Onda Qaraqalpaqstan Respublikası Prokuraturası bólim prokurorı A.Zaripov Qaraqalpaqstan Respublikası Jınayat isleri boyınsha Nókis qalalıq sudı sudyası R.Kaukıshev, Qaraqalpaqstan Respublikası Ishki isler ministrliginiń Tergew basqarması baslıǵı orınbasarı R.Igamberdiev, Qaraqalpaqstan Respublikası Ádillik ministrligi úgit-násiyat bólimi baslıǵı A.Otewliev, universitet prorektorları, bólim baslıqları, fakultet dekanları, oqıw isleri boyınsha dekan orınbasarı, Jaslar menen islesiw boyınsha dekan orınbasarı, topar tyutorları hám universitet profilaktika inspektorları qatnastı.

Ushırasıwdı universitet rektorı A.Reymov alıp barıp, ol óz sózinde korrupciya dúnya kóleminde sheshiliwi kerek bolǵan global mashqalalardıń biri ekenligi, bunday jaman illet hár qanday mámleket hám jámiyettiń siyasiy ekonmikalıq rawajlanıwına keri tásirin kórsetip, insan huqıq hám erkinlikleriniń ayaq astı bolıwına alıp keletuǵınlıǵın, usınday unamsız jaǵdaylarǵa qarsı gúresiw búgingi kún siyasatınıń áhmiyetli máseleleriniń biri ekenligin aytıp ótti.

Bunnan soń, Qaraqalpaqstan Respublikası Prokuraturası bólim prokurori A.Zaripov sózge shıǵıp, korrupciyaǵa qarsı gúresiw, olarǵa imkaniyat jaratıp berip atırǵan sebep hám jaǵdaylardıń aldın alıw boyınsha bir qatar Nızamlar hám nızam astı hújjetleri qabıl etilgenligin hám ayrım joqarı oqıw orınlarnda korrupciya menen baylanıslı halatlardıń ushırasıp atırǵanlıǵın aytıp, bársheni bunday jaman illetten awlaq bolıwǵa shaqırdı. Sonday-aq, ilajda sózge shıqqanlar korrupciya –jámiyettiń rawajlanıwına keri tásir etip qoymastan, elimizdegi háreket etip turǵan nızamlarǵa isenimsizlik hám olarǵa húrmetsizlik túsinigin payda etetuǵınlıǵın, sonlıqtanda bul illetke qarsı gúresiw eń aldı menen hár bir insannıń ózine baylanıslı ekenligin, korrupciyanın aldın alıwda jámiyetshilik qadaǵalawın kúsheytiw kerek ekenligin aytıp, bársheni bul jaman illetke qarsı gúresiwde biyparwa bolmawǵa shaqırdı.

QMU baspasóz qızmeti.