500.000 sum berseń «pravań» tayın
Nókis qalasında jasawshı N.S. isimli shaxs miynet etpey ańsatlıq penen pul tabıwdı oylap, N.S ózgelerdiń pulların aldawshılıq jolı menen qolǵa kirgiziw maqsetinde, D.E. nıń isenimine kirip, D.E ge tanısları arqalı aydawshılıq gúwalıǵın alıw ushın bolıp ótetuǵın imtixannan 500.000 sum pul esesine ótkerip beriwdi wáde etedi. 2021-jıl 26-yanvar kúni saat 20:45 ler shamasında N.S Nókis qalası, Azatlıq kóshesi boyında D.E tan 500.000 sum puldı alǵan waqtında huqıq qorǵaw uyımı xızmetkerleri tárepinen irkilgen.
Bul háreket boyınsha jınayatli is qozǵatıldı. Is jınayat isleri boyınsha Bozataw rayonı sudı tárepinen kórip shıǵıldı.
Jınayat isleri boyınsha Bozataw rayonı sudınıń 28.04.2021-jılǵı húkimine tiykar N.S. Ózbekstan Respublikası Jınayat kodeksiniń 25,168-statyası 1-bólimi hám 25,28, 211-statyası 1-bólimi menen ayıplı dep tabılıp, sudlanıwshı N.S ǵa Ózbekstan Respublikası Jınayat kodeksiniń 25,168-statyası 1-bólimi menen is haqınıń 20 payız muǵdarın mámleket paydasına uslap qalǵan halda 1 (bir) jıl muddetke miynet dúzetiw isleri jazası tayınlandı.
Ózbekstan Respublikası Jınayat kodeksiniń 25,28,211-statyası 1-bólimi menen 57-statyası qollanılıp hár ay sayın is haqısınan 20 % muǵdarın mámleket dáramadı esabına uslap qalǵan halda 1 jıl múddetke dúzetiw isi jazası tayınlandı.
Tayınlanǵan jazalar Ózbekstan Respublikası Jınayat kodeksiniń 59-statyası tártibinde qosılıp, úzil-kesil negizgi óteytuǵın jazası hár ay sayın is haqısınan 20 payızı muǵdarın mámleket dáramadı esabına uslap qalǵan halda 1 jıl 1 ay múddetke dúzetiw isi jazası tayınlandı.
Zuxra Bayımbetova,
Jınayat isleri boyınsha Bozataw rayonı sudınıń baslıǵı