Ishiwshiliktiń aqıbeti qamaq penen juwmaqlandı
Kópshilik jaǵdayda kewilsiz hádiyseler biytalaplıq, jumıssızlıq aqıbetinde júzege keledi. 1976-jılı Qanlıkól rayonında tuwılǵan Serikjan (atı ózgertilgen)da mine bir neshshe jıllardan berli talabı kelispey jumıssız. Onıń ústine ishiwshilikke berilip, tapqanın araqqa sarıplaydı, jetpegendey iship alıp úyindegi gúldey hayalına túrli aqıret sózlerdi aytıp, qol kóterip uradı, basım ótkerip azap beredi. Usınıń aqıbetinde bir neshshe mártebe jámiyetlik tártipti buzǵanlıǵı ushın hákimshilik juw apkershilikke tartılıp, járiyma tólese de bunnan durıs juwmaq shıǵarıwdıń ornına eski ádetin jáne dawam eteberedi. Barqulla kúyewinen aqıret sózlerdi esitip, hátte «tayaǵına» kóngen hayalınıń «sabır kesası toldı». Tiyisli organlarǵa múrájáát etip ózine qorǵanıw orderin aldı.
«Endi tınısh jasaymanaw»,-degende Serikjan eski ádetin tákirarlap, hayalına iship kelip azap beriwdi basladı. Náwbettegi usınday jánjelge sud zalında tıyım salındı.
Serikjan ózi jasaytuǵın aymaqta más halında, shawqım salıp júrgeninde ishki isler organları xızmetkerleri tárepinen irkilip, Qanlıkól rayon medicina birlespesine qaraslı ayıqtırıw xanasına alıp barılıp jeke kórikten ótkerilgende qaltasınan ótkir ushlı shaqqı pıshaǵı bar ekenligi anıqlanıp, qalıslar qatnasında pıshaq ayǵaqlı zat retinde alınǵan.
Sonday-aq, huqıqbuzar ómirlik joldasına qorǵanıw orderi berilgenligine qaramastan spirtli ishimlik ishken más halında úyine kelip jáne oǵan ruwxıy basım ótkergen.
Huqıqbuzar Serikjan joqarıda kórsetilgen is háreketleri menen Ózbekstan Respublikası Hákimshilik juwapkershilik haqqındaǵı kodekstiń 183-statyası, 206-1-statyası hám 185-2-statyası 2-bóliminde kórsetilgen huqıqbuzarlıqlardı islegen.
Jınayat isleri boyınsha Qanlıkól rayonı sudı tárepinen Jınayat isleri boyınsha Qanlıkól rayon sudı baslıǵı M.Bekimbetov basshılıǵında, sudya járdemshisi T.Nurlepesovtıń xatkerliginde, jábirkesh hám huqıqbuzardıń qatnasında Qanlıkѳl rayonı ishki isler bólimi tárepinen huqıqbuzar Serikjannıń qarsısına toplanǵan hákimshilik isi ashıq sud májilisinde kórip shıǵıldı.
Huqıqbuzar sud májilisinde islegen is-háreketin tolıq moyınlap, kórsetpe berdi.
Jábirkesh hayalı bolsa sud májilisinde ómirlik joldası kóp ishetuǵının, aldın iship kelip basım ótkergenligi sebepli qorǵanıw orderi alǵanın, biraq soǵan qaramastan jáne iship kelip ózine basım ótkergenin aytıp nızamda belgilengen jazasın tayınlawdı soradı.
Huqıqbuzardıń is-háreketleri óziniń sudtaǵı bergen kórsetpesinen tısqarı, jábirkeshtiń kórsetpesi, sorastırıw dáwirindegi arzaları, fotosúwretleri, hákimshilik huqıqbuzarlıq haqqındaǵı bayannaması hámde is boyınsha toplanǵan basqada dáliller menen tolıq tastıyıqlanıp, sud qarar etti.
Sud qararına muwapıq, huqıqbuzarǵa Ózbekstan Respublikası Hákimshilik juwapkershilik haqqındaǵı kodekstiń 183-statyası, 206-1-statyası hám 185-2-statyası 2-bólimi menen 15 (on bes) sutka hákimshilik qamaq jazası tayınlandı.
Maqset Bekimbetov,
Jınayat isleri boyınsha Qanlıkól rayon sudı baslıǵı