Jarasqanlıq múnásibeti menen jınayat isi óndiristen qısqartıldı
Búgin jollar avtotransportlar menen tolı, piyadalarda soǵan jarasa. Degen, menen jollardaǵı azǵana itibarsızlıq aqıbetinde kimnińdur densawlıǵına zıyan jetkeriw, yaki ómirine zawal bolıw múmkinligin piyada da, transport basqarıwshıları da este tutsa paydadan jıraq bolmas edi.
Jınayat isleri boyınsha Nókis rayonlıq sudında ótkerilgen ashıq kóshpeli sud májlisinde transport hádiydesine baylanıslı is kórip shıǵıldı. Avtotransport basqarıwshısınıń háreket qáwipsizligine itibarsızlıǵı aqıbetinde júz bergen transport hádiysesi rayondaǵı “Tóktaw” mákan puqaralar jıyınında aymaq turǵınlarınıń qatnasıwında kórildi.
Sud processinde gúman etiliwshi qılınıwshı 1986-jılı Nókis rayonında tuwılǵan “M” ismli shaxs dáslepki tergew uyımı hújjetlerine bola, 2023-jıldıń 3-mart kúni saat 19:00 lar shamasında, óziniń basqarıwındaǵı ájaǵasına tiyisli bolǵan “Spark” markalı avtomashinasın Nókis rayonı “Samanbay” awıl puqaralar jıyını aymaǵınan ótip turǵan 4R175 asfalt jolı menen basqarıp baratırıp, usı joldıń 3-4 kilometr aralıǵına kelgen, joldı piyada ótip kesip ótip atırǵan jas óspirim “N” dı avtomashinasınıń aldı tárepi menen qaǵıp alǵan. Nátiyjede jas óspirim dene jaraqatın alıp emlewxanaǵa túsken. Solay etip, “M” joqarıda kórsetilgen jınayıy is háreketleri menen Ózbekstan Respublikası Jınayat kodeksiniń 266-statyası 1-bóliminde kórsetilgen jınayattı islegen.
Dáslepki tergew dáwirinde gúman etiliwshi “M” jábirleniwshiniń nızamlı wákili “V” Nókis rayonı ishki isler bólimi baslıǵına arza menen múrájat etip, jınayat isin jarasqanlıq múnásibeti menen qısqartıwdı soraǵan.
Is boyınsha jábirleniwshiniń nızamlı wákili “V” 2023-jıl 3-mart kúni saat 19:00 lar shamasında, joldı piyada ótip kesip ótip atırǵan jas óspirim balası “N”dı bir avtomashina qaǵıp ketip emlewxanaǵa túskenligin, házirgi waqıtta balasınıń densawlıǵı jaqsı ekenligin, bul waqıya boyınsha “M” keshirim soraǵanlıǵın, onıń menen óz-ara jarasıp ketkenligin, ol keltirilgen zıyanlardı tolıq tѳlep bergenligin, oǵan hesh qanday arza dawı joqlıǵın, sol sebepli “M”nıń qarsısına qozǵatılǵan jınayat isin jarasıw múnásibeti menen ѳndiristen qısqartıwdı sorap, arzasın óz erki menen jazǵanlıǵı, oǵan birde-bir sırttan tásir bolmaǵanlıǵı, jarasıw sud tárepinen tastıyıqlanǵannan keyin kelip shıǵatuǵın huqıyqıy aqıbetlerdi túsingenligi hakqında kórsetpe berip, jınayat isin qısqartıwdı soradı.
Ózbekstan Respublikası Jınayat Kodeksiniń 66-1-statyasına muwapıq, Jınayat Kodeksiniń 266-statyası 1-bóliminde názerde tutılǵan jınayattı islegen shaxs, eger ol óz ayıbın moyınlasa, jábirleniwshiler menen jarassa hám jetkerilgen zıyandı qaplasa, jarasqanlıq múnásibeti menen jınayıy juwapkershilikten azat etiliwi múmkin. Sonlıqtan, sud jábirleniwshiniń nızamlı wákili “V” nı hám gúman etiliwshi “M” nıń jarasıw haqqındaǵı arzaların, jınayat is hújjetleri menen birge úyrenip, Nѳkis rayonı prokurorı járdemshisiniń jınayat isin jarasqanlıq múnásibeti menen qısqartıw hakqındaǵı pikirin tıńlap, gúman etiliwshiniń aldın sudlanbaǵanlıǵın, ayıbın tolıq tán alǵanlıǵın hám jetkerilgen zıyannıń tolıq qaplanǵanlıǵın, jábirkesh hám gúman etiliwshige sırttan tásir bolmaǵanlıǵın, jarasıw olardıń qálewi menen bolıp atırǵanlıǵın hám Ózbekstan Respublikası Jınayat Kodeksiniń 266-statyası 1-bóliminde názerde tutılǵan jınayat Jınayat Kodeksiniń 66-1-statyasına muwapıq, jarasıwǵa túsiwin inabatqa alıp, “M”nıń qarsısına júrgizilgen jınayat isin jarasqanlıq múnásibeti menen óndiristen qısqartıwdı uyǵardı.
AZAT SEYTANOV,
Jınayat isleri boyınsha Nókis rayonlıq sudınıń baslıǵı