Ógey anasın óltirgen bala 15 jılǵa qamaldı
Insanǵa ómir alla taala tárepinen inam etiledi, oǵan qol qatıwǵa yaki bul ómirden ayırıwǵa hesh kimniń haqqı joq. Dana xalqımız ázelden hayaldı, ananı ulıǵlap, onı qasterlep abaylaǵan. Jánnetti analardıń ayaǵı astına tósegen. Mine usınday bir qolı menen besikti, bir qolı menen dúnya terbete alǵan anaǵa qol kóterip urıp azaplaw, óltiriw … Qoy, qoy, bul sanalı adamnıń qolınan keletuǵın is emes, bul biziń mentalitetimizge de ulıwma jat illet, eń awır gúna hám jınayat.
Biraq, Sabırbay (atları ózgertilgen) usı eń awır jınayatqa qol urdı. Sebebi, arzımaǵan ótmishtegi elesler…
Sabırbaydıń anası ol 5 jasqa tolǵanda qaytıs boldı, ájapası Malika menen ákesi úshewi qaladı. Anasınıń jılı ótkennen keyin ákesi Sulıwxan atlı kelinshekke úylenedi. Onnan 4 perzent tuwıladı. Eki úlken ájapaları turmısqa shıǵıp, úyli jaylı bolıp ketti. Ákesi de turmıs awırmanlıǵı, bala-shaǵanı baǵıw oyı menen Qazaqstan Respublikasına barıp bir múddet jumıs islep keletuǵın edi.
Bul jınayat júz bergen kúni Sabırbaydıń ákesi sırt elde edi. Sabırbaydıń keyingi waqıtları isi de júrispey, áp-ánedey xojalıǵınan da ayırılısıp júrgen kúnleri. Sol sebepli áke úyinde ońısıp, jasap atır edi.
Ádettegidey, jumıstan saat 18: 00 ler shamasında ákesiniń úyine kelgen Sabırbay ógey anası Sulıwxan menen dasturxan basında aytısıp qaladı, chayların iship bolǵannan keyin «endi úyińe kelmeymen» dep esikti shart jawıp shıǵıp ketedi. Sabırbaydıń jaqsı niyetler menen salıp atırǵan taza jayı bar edi, ol sol jerge barıp, ustalarǵa beremen dep qoyǵan bir shiyshe araǵın klasslas jorası Maqsetti shaqırıp iship aladı. Ishke túsken «shaytan» qoyama «eki adamǵa bir shiyshe degen ne?» dep Sabırbay endi kóplew 0, 75 l araqtı ákelip quyadı. Maqset erteń jumısqa baraman, «men boldım jora» dep keyingi araqtan 1 kese ishedi de, qaytıp awzına almaydı. Al, Sabırbay bolsa qalǵan araqtıń bárin bir ózi iship tawısadı, ábden más bolıp, úyge qaytayıq degen Maqsettiń betine mush penen urıp, buwındıradı, kútilmegen bul hujimnen Maqset jerge sılq etip qulap qaladı.
Sabırbay oǵan itibar bermesten shıǵıp ketip, tuwrı ákesiniń úyine ógey anasınıń aldına baradı. Esikti tewip ashıp, bar dawısı menen úyde shawqım shıǵara baslaydı. Oyına hesh jamanlıq keltirmegen Sulıwxan chay iship otırǵan eki balasın alıp ishkerige kirip ketedi. Sabırbay Sulıwxandı shaqırıp, oǵan awzına kelgen jaman sózlerdi aytıp aqıretlep, julqıy ketti. Bunı kórgen eki úkesi «anamdı jiber, anama tiyme» degenine «mına eki balańdı ishke kirgizbeseń, seni solardıń kózinshe azaplap óltiremen» dep qorqıtadı. Sulıwxan eki balasın tórgi bólmege kirgizedi. Ógey anasınıń «maǵan tiyme, júregim awıra, ózi keshe emlewxanadan shıqtım» degen jalınıshlı sózleri Sabırbaydıń qulaǵına da kirmeydi.
-«Sen bala gezimizde ajapam ekewimizge kóp azap berdiń, iyt tabaqta awqat berdiń, endi seni ózim óltiremen» dep bar kúshi menen Sulıwxandı shashınan súyrep ura ketti. Birese diywalǵa taqap, buwındıradı, birese jerge jatqarıp ústine minip bet-júzin mushlaydı, dus kelgen jerine urıp, ógey anasın jawızlarsha óltiredi.
Aqıbetinde, Sabırbaydıń úkeleri anasız, óziniń perzentleri bolsa ákesiz ósetuǵın boldı. Bala shaǵa ǵamında sırt ellerde qara miynet penen nan tawıp júrgen áke ómirlik joldasınıń ólimine bir kúygen bolsa, perzentiniń bul qılmısına, onıń áyne jaslıq dáwiri qamaqta ótetuǵınına eki kúyindi.
Jınayat isleri boyınsha Qońırat rayonı sudında ashıq sud májlisinde kórilgen bul jınayat isi boyınsha sudya húkim oqıdı.
Oǵan bola Sabırbay Ózbekstan Respublikası Jınayat kodeksiniń 97-statyası 2-bólimi «j» bántinde názerde tutılǵan jınayattı qastan islegenlikte ayıplı dep tabılıp, 15 (on bes) jıl múddetke erkinen ayırıw jazası tayınlandı.
Dáwletbay Razov,
Qaraqalpaqstan Respublikası sudınıń sudyası