Avtomobil transportında jolawshılar tasıw iskerligi menen licenziyasız shuǵıllanǵan 14 puqaranıń isi ashıq kóshpeli sud májilisinde kórildi
Jolǵa shıqqanda hár kim óz mánziline jetiw ushın asıǵadı. Álbette, bunda mánzilge qáwipsiz hám isenimli, óz waqıtında jetip barıw birinshi másele. Degen menen siz mingen avtotransport yamasa taksi xızmeti menen shuǵıllanıp kiyatırǵan shaxslardıń jollarda tiyisli taraw wákilleri tárepinen irkilip, nızamsız háreketi anıqlansa, bul jolawshıǵada jáne transport basqarıwshısına da qolaysızlıq tuwdırarı tábiyiy.
Ózbekstan Respublikası Hákimshilik juwapkershilik haqqındaǵı kodekstiń 176 – statyası 3-bántine muӯapıq avtomobil transportında jolawshılar tasıw iskerligi menen licenziyasız shuǵıllanıw puqaralarǵa bazalıq esaplaw muǵdarınıń 7 esesi, al ámeldar shaxslarǵa 30 esesine shekem járiyma qollanıw belgilengen.
Degen menen házirgi waqıtta ayırım transport basqarıӯshıları nızam talaplarına boysınbastan, arnawlı licenziyasız xalıqqa xızmet kórsetiw jaǵdayları ushıraspaqta.
Bul boyınsha Qaraqalpaqstan Respublikası Transport ministrliginiń Avtomobillerde tasıӯlar qáwipsizligin támiyinlewdi baqlaw bóliminiń qala hám rayonlardaǵı sektor inspektorları hám Jol partul xızmeti inspektorları menen qospa reyd ilájları ótkerilip, nızam buzıwshılıq jaǵdayları anıqlanbaqta.
Usınday nızam talapların buzǵan avtotransport basqarıw shılarına tiyisli tártipte járiyma jazasın belgilew boyınsha Qaraqalpaqstan Respublikası Transport ministrliginiń imaratında kóshpeli sud májlisi bolıp ótti. Jınayat isleri boyınsha Qaraózek rayonı sudınıń sudyası Jeńis Allaniyazov basshılıǵında ótkerilgen kóshpeli ashıq sud májilisinde, nızam talapların buzıp avtotransport xızmeti menen shuǵıllanıp júrgen 14 puqaranıń isi boyınsha tiyisli nızamlı sharalar kórildi.
Durıs, turmıs ǵalma ǵalı, bala-shaǵanı baǵıw bánesi menen nızam talaplarına boysınbay háreketleniw waqıtı kelip usınday juwapkershilikke sebep boladı. «Is quralıń saz bolsa, mashaqqatıń da az boladı» degenindey, xalıqqa nızamlı turde avtotransport xızmetin kórsetiw hám transport basqarıwshıları, hám jolawshılar ushın da qáwipsiz jáne qolaylı.
Jeńis Allaniyazov,
Jınayat isleri boyınsha Qaraózek rayonı sudınıń sudyası