QARAQALPAQSTAN RESPUBLIKASÍ KONSTITUCIYASÍNÍŃ 33 JÍLLÍǴÍ KEŃ TÚRDE BELGILENDI
Qaraqalpaqstan Respublikası Konstituciyasınıń 33 jıllıǵı múnásibeti menen Qaraqalpaqstan awıl xojalıǵı hám agrotexnologiyalar institutında bayram aldınan ruwxıy-aǵartıwshılıq ushırasıw joqarı dárejede shólkemlestirildi.
Ilajda Ózbekstan Respublikası hám Qaraqalpaqstan Respublikasınıń mámleketlik gimnleri jańlap, qatnasıwshılarda joqarı maqtanısh sezimlerin oyattı. Bunnan soń institut rektorı N.Absattarov kiris sózi menen ilajdı ashıp, miymanlardı tanıstırdı hám barlıq qatnasıwshılardı usı qutlı sáne menen qızǵın qutlıqladı. Ol óziniń shıǵıp sóylegen sózinde Konstituciyanıń jámiyet rawajlanıwındaǵı sheksiz ornı hám áhmiyetine ayrıqsha toqtap ótti.
Qaraqalpaqstan Respublikası Joqarǵı Keńesiniń komitet baslıǵı Sh.Ótemisov óziniń bayanatında Konstituciyanıń qabıl etiliwi tariyxıy burılıs bolǵanın, ol mámleket hám jámiyettiń demokratiyalıq rawajlanıw jolın belgilep bergen áhmiyetli huqıqıy hújjet ekenin atap ótti. Sonday-aq, Tiykarǵı nızamımız insan huqıqları menen erkinliklerin támiyinlew, milliy huqıqıy sistemanı qáliplestiriwde bekkem tiykar bolıp xızmet etip atırǵanı atap ótildi.
Sonday-aq, Qaraqalpaqstan Respublikası sudı baslıǵınıń orınbasarı B.Ktaybekov shıǵıp sóylep, Konstituciya hár bir mámlekettiń siyasiy, huqıqıy hám ruwxıy kelbetin belgilep beretuǵın tiykarǵı hújjet ekenin atap ótti. Ol 1993-jıl 9-aprelde qabıl etilgen Konstituciya jańa mámleket hám jámiyet qurılısında bekkem tiykar bolǵanın, mine usı hújjet arqalı jámiyet turmısınıń barlıq tarawların tártipke salatuǵın huqıqıy sistema qáliplestirilgenin ayrıqsha atap ótti.
Ilajda Qaraqalpaqstan Respublikası prokuraturası bólim baslıǵı A.Abdikarimov ta qatnasıp, Konstituciyada insan huqıqları menen erkinlikleri tiykarǵı áhmiyetke iye ekeni, bul normalar xalıqaralıq huqıqtıń ulıwma tán alınǵan principlerine sáykes keletuǵınına ayrıqsha itibar qarattı.
Ushırasıw dawamında student-jaslar belsene qatnasıp, ózlerin qızıqtırǵan sorawlar menen múrájat etti. Qánigeler tárepinen berilgen hár tárepleme juwaplar jaslardıń huqıqıy bilimlerin jáne de bekkemlewge xızmet etti.
