MIYNET TARTÍSLARÍN SHESHIW HÁM ALDÍN ALÍW MAQSETINDE ÁMELIY SEMINAR SHÓLKEMLESTIRILDI
Qaraqalpaqstan Respublikası sudında «Puqaralıq isleri boyınsha sudlarda miynet tartısların kórip shıǵıw hám aldaǵı waqıtlarda bunday kelispewshiliklerdiń aldın alıw ilajları» atamasında tiyisli taraw wákilleri ushın ámeliy seminar shólkemlestirildi. Ilaj mámleketlik uyımlar, kárxana, shólkem hám mákemelerde jumıs alıp barıp atırǵan yuristler ushın mólsherlengen bolıp, miynet nızamshılıǵına ámel etiw, ámelde ushırasıp atırǵan mashqalalardı dodalaw hám sud ámeliyatın jetilistiriwge qaratıldı.
Seminarda Qaraqalpaqstan Respublikası sudı baslıǵınıń orınbasarı A.Kerimbaev jańa redakciyada qabıl etilgen Miynet kodeksi hám ondaǵı huqıqıy normalardıń áhmiyeti, olardı ámeliyatta durıs qollanıw máseleleri haqqında sóz etti. Atap ótilgenindey, puqaralıq isleri boyınsha rayonlararalıq sudları tárepinen 2025-jıldıń 6 ayı dawamında miynet qatnasıqlarına baylanıslı jámi 551 puqaralıq isi kórip shıǵılǵan bolıp, islerdiń 328 i 59,5 procenti boyınsha dawa arzalar qanaatlandırılǵan. Jumısqa tiklew haqqındaǵı dawalar boyınsha kórilgen 150 istiń 78 i yamasa 52 procenti boyınsha jumıs beriwshilerdiń buyrıqları nızamsız dep tabılıp, xızmetkerler jumısqa tiklengen. Jumısqa tiklew haqqındaǵı kelispewshilikler tarawlar (juwapker subektler) kesiminde tallanǵanda, 2025-jıldıń 6 ayında kórilgen jumısqa tiklew haqqındaǵı kelispewshiliklerdiń 34 i bank, 31 i mektepke shekemgi hám mektep bilimlendiriw shólkemleri, 19 ı densawlıqtı saqlaw sistemasındaǵı shólkemler, 9 ı ishki isler uyımları, 5 i suw támiynatı kárxanaları,5 i bántlikke kómeklesiw orayları, 4 i mádeniyat bólimleri, 3 i hákimlikler hám 40 ı basqa da mámleketlik uyımlardıń úlesine tuwra keledi.
Ilajǵa Ózbekstan Respublikası Joqarǵı sudı sudyaları J.Rasulov hám A.Ayapov, puqaralıq isleri boyınsha sudyalar, Qaraqalpaqstan Respublikası prokuraturası, Ishki isler ministrligi, Kámbaǵallıqtı qısqartıw hám bántlik ministrligi, Ózbekstan kásiplik awqamları Federaciyasınıń Qaraqalpaqstan Keńesi hám basqa da juwapker uyımlardıń wákilleri qatnasıp, miynet qatnasıqlarında ushırasıp atırǵan nızambuzıwshılıq jaǵdayların talqılap, óz-ara pikir alıstı.
Atap aytqanda, xızmetkerlerdi jumıstan bosatıwda belgilengen tártiplerge ámel etilmey atırǵanı, jumıs beriwshiler tárepinen jumısshılardı basqa lawazımǵa ótkeriwde rásmiylestiriwde kemshiliklerdiń ushırasıp atırǵanı, miynet shártnamalarınıń nızamsız túrde biykar etiliwi, keshiktirilip tólengen miynet haqı ushın sud arqalı kompensaciya óndiriw sıyaqlı jaǵdaylar dodalandı.
Ótkerilgen seminardıń tiykarǵı maqseti de miynet tarawındaǵı huqıqbuzarlıqlardıń aldın alıw, jumıs beriwshi hám xızmetker arasındaǵı qatnasıqlarda nızam ústinligin támiyinlew bolıp tabıladı.
Bul bolsa, óz gezeginde, miynet qatnasıqlarında turaqlılıqtı támiyinlew, tájiriybe almasıw, jańa Miynet kodeksi normaların durıs qollanıw hám sud ámeliyatın bekkemlewge xızmet etedi.
