JÍNAYATSHÍLÍQ HÁM HUQÍQBUZARLÍQTÍŃ AQIBETLERIN TÚSINDIRIW MAQSETINDE KÓSHPELI SUD MÁJILISI SHÓLKEMLESTIRILDI
Beruniy rayonında Jaslar orayında sudyalardıń jaslar menen ushırasıwı hám kóshpeli sud májilisi ótkerildi.
Ilajǵa Beruniy rayonı jınayat isleri boyınsha sudınıń tergew sudyası I.Allaniyazov hám Nókis rayonlar aralıq hákimshilik sudınıń sudyası A.Salievlar qatnastı.
Ushırasıw dawamında tergew sudyası I.Allaniyazov jaslar arasında jınayatshılıq hám huqıqbuzarlıqlardıń aldın alıw, bul illetlerdiń unamsız aqıbetleri haqqında sóz etti. Ol jınayat islewdiń aqıbetleri, nızamshılıqtaǵı tártipler hám jaslardıń huqıqıy sanasın asırıw boyınsha alıp barılıp atırǵan jumıslar haqqında jaslarǵa hár tárepleme túsinik berdi. Sonday-aq, Ózbekstan Respublikası Prezidentiniń 2025-jıl 22-yanvardaǵı PQ-1-sanlı qararı tiykarında máhállelerde qáwipsiz ortalıq jaratıw, huqıqbuzarlıqlardıń erte aldın alıw sistemasınıń nátiyjeliligin arttırıw baǵdarında ámelge asırılıp atırǵan ilajlar haqqında da maǵlıwmat berdi.
Nókis rayonlar aralıq hákimshilik sudınıń sudyası A.Saliev bolsa Ózbekstan Respublikasınıń 2025-jıl 11-marttaǵı ÓRN-1047-sanlı Nızamınıń mazmun-mánisin atap ótip, usı nızam tiykarında sud sistemasında jaratılǵan qolaylıqlar, atap aytqanda, sud processlerin aralıqtan turıp (onlayn tárizde) ótkeriw imkaniyatı haqqında maǵlıwmat berdi. Sudya sud májilisiniń real waqıt rejiminde aralıqtan turıp qanday shólkemlestiriliwi múmkin ekenligin jaslardıń qatnasıwında ámeliy tárizde kórsetip berdi. Bul bolsa jaslar ushın zamanagóy sud sistemasınıń imkaniyatların tikkeley baqlaw imkaniyatın jarattı.
Sonday-aq, jınayat isleri boyınsha Beruniy rayonı sudınıń tergew sudyası I.Allaniyazov tárepinen jınayatshılıq hám huqıqbuzarlıqtıń aqıbetlerin túsindiriw maqsetinde kóshpeli sud procesi shólkemlestirildi. Jaslar bul sud májilisinde tikkeley qatnasıp, sud procesiniń barısın ámeliy jaqtan baqlaw imkaniyatına iye boldı.
Ilaj dawamında sudyalar jaslar menen ashıqtan-ashıq sóylesip, olardı qızıqtırǵan sorawlarǵa tolıq juwaplar berdi.
Bul ushırasıw jaslardıń huqıqıy bilimin arttırıw hám huqıqıy mádeniyatın bekkemlewde úlken áhmiyetke iye boldı.