MÁHÁLLEDE KÓSHPELI ASHIQ SUD MÁJILISI ÓTKERILDI
Jınayat isleri boyınsha Xojeli rayonı sudı baslıǵı S.Davletmuratov tárepinen rayondaǵı “Bayterek” mákán puqaralar jıyınında kóshpeli ashıq sud májilisi ótkerildi.
Onda Ózbekstan Respublikası Jınayat kodeksiniń 169-statyası 2-bólimi «g» bánti menen ayıplanǵan shaxstıń qarsısına toplanǵan jınayat isi kórip shıǵıldı hám sud hukimi menen 20 (jigirma payız) mámleket paydasına uslap qalıw jolı menen 2(jıl) múddetke dúzetiw jazası tayınlandı.
Sonday-aq, Ózbekstan Respublikası Jınayat kodeksiniń 266-statyası 1-bólimi menen ayıplanǵan shaxstıń qarsısına toplanǵan jınayat isi de ashiq kóshpeli sud májilisinde kórip shıǵıldı. Sudya istegi barlıq dáliyllerdi úyrenip, jábirkesh, gúwa hám sudlanıwshınıń aqırǵı sózlerin tıńlap, tómendegishe uyǵardı.
Sudlanıwshı shaxstıń óz ayıbın tolıq tán alıp, pushaymanlıq bildirgeni hám jábirleniwshige jetkerilgen zıyandı tolıq qaplap bergenligi, jábirleniwshiniń nızamlı wákili tárepinen sudlanıwshıǵa keshirim berilgenligi esapqa alınıp, jınayat isi táreplerdiń óz-ara jarasqanlıǵı múnásibeti menen Ózbekstan Respublikası Jınayat Processual Kodeksiniń 84-statyasınıń 4-bólimine tiykar óndiristen qısqartıldı.
Bunnan soń, sud baslıǵı tárepinen “Qızıl aymaq”qa kirgizilgen bul aymaqta júz bergen huqıqbuzarlıqlar talqılanıp, aldaǵı bunday kewilsiz jaǵdaylardıń aldın alıw boyınsha piker alısıldı. Sonday-aq, jınayatshılıq hám huqıqbuzarlıqlardıń aldın alıw baǵdarında qabıl etilip atırǵan nızam hújjetleri, nızamshılıqqa kirgizilip atırǵan ózgeris hám qosımshalar boyınsha puqaralarǵa keń túrde túsinikler berildi.