ITIBAR HÁM HÚRMET BELGISI
«Ustaz atańday ullı» deydi dana xalqımız. Durısında da, barqulla jası úlkenge húrmet, jası kishige izzette bolıp kelgen xalqımız ilim-bilim sırların jalıqpastan úyretip, ómirden hám jámiyetten múnásip orın tabıwǵa jol-joba bergen ustaz-muǵallimlerimizdi húrmetlep, qádirleydi. Olarǵa hámiyshe tájimde.
Sáne múnásibeti menen Ózbekstan Respublikası Sudyalar joqarǵı keńesiniń baslaması menen ádil sudlawdı ámelge asırıw menen birge ılayıqlı jetik kadrlardı jetistiriwde de ayrıqsha belsendilik kórsetken bir topar sud nuraniyleriniń miynetlerin jáne bir mártebe xoshametledi. Olarǵa bayram qutlıqlawı menen birge estelik sawǵaları da inam etildi.
Orınlarda bolǵanı sıyaqlı, Qaraqalpaqstan Respublikası sudında da saltanatlı ilaj ótkerilip, onda «Doslıq» ordeni, «Sud faxriysi» hám «Mutabar ayol» kókirek belgileriniń iyesi Arzıbiyke Janibekovaǵa bayram sawǵaları tapsırıldı.
Haqıyqatında da kóz nurın,bilim hám tájiriybesin, pútkil sanalı ómirin jas áwladqa bilim hám tárbiya beriwge, olardı milliy hám ulıýma insanıylıq qádriyatlar ruwxında tárbiyalawǵa baǵıshlaǵan, aydın keleshek tiykarın jaratıp atırǵan bul insanlardıń miynetin qanshelli qádirlesek te az.
Ilajda Qaraqalpaqstan Respublikası sudı baslıǵınıń orınbasarı A.Adilov sud jámááti atınan da sud nuraniyin bayram menen qutlıqlap, bekkem den-sawlıq, shańaraqlıq baxıt hám aldaǵı jumıslarında tasqın tabıslar tilep, esetlik sawǵaların tapsırdı.
Ilaj bayram qutlıqlawları menen dawam etti.
