Jaqsınıń atı óshpeydi…
9-may Eslew hám qadirlew kúni múnásibeti menen Qaraqalpaqstan Respublikası hákimshilik sudınıń baslıǵı A.Nurlipesov hám sudyalar tarawda islep, pandemiya aqıbetinde qaytıs bolǵan marxum sudya Begdulla Auezimbetovtıń shańaraǵında bolıp olardıń xal jaǵdaylarınan xabar aldı.
Begdulla Auezimbetov 1976-jılı Xojeli rayonında tuwılǵan. 2006-jılı joqarı maǵlıwmatqa iye bolǵan ol 14 jıl jumıs sud-huqıq tarawında jemisli miynet etti. Ol 2017-jıldan ómiriniń sońǵı kúnlerine shekem Shımbay rayonı hákimshilik sudınıń baslıǵı lawazımında isledi.
Marxum kásiplesin eske alar eken, onıń perzentlerine ákesiniń jaqsı adamgershilikli pazıyletlerin maqtanısh etti. Ómir qısqa, biraq sonday insanlar bar, bul qısqa ǵániymet ómirde islegen iygilikli isleri, jaqsılıqları, adamgershilikli pazıyletleri menen jaqınlarına, átirapındaǵı dos-yaranlarına mıń jılǵa tatırlıq estelik qaldırıp ketedi.
“Begdulla sonday jaqsı insan edi, búgingi isti erteńge qaldırmaydı. Oqıp, izleniwden hesh sharshamaytuǵın edi. Bizler universitette birge oqıdıq. Jası bizlerden biraz úlken bolsa da barqulla óziniń kishipeyilligi, bir sózliligi menen gruppalasları arasında húrmet-izzetke iye edi. Sud tarawında birge islesiw baxıtı nesip etti. Ol ádillikti óziniń qorǵanı dep bildi. Bunıń ushın bar kúsh-jigerin ayamadı”-deydi Nókis rayonlar aralıq hákimshilik sudınıń baslıǵı Bekbawlı Dosımbetov kásiplesip eslep.
Durısında da, jaqsınıń atı óshpeydi. Áke jolın dawam ettirip atırǵan ekinshi perzenti Ayzada búgingi kúnde Nókis rayonlar aralıq hákimshilik sudında sudya járdemshisi bolıp jumıs islep atır. “Men ákem menen maqtanısh etemen. Keleshekte ákeme uqsaǵan sudya bolaman. Onıń islegen dáwirinde kiygen mantiyasın kózimniń qarashıǵınday saqlap qoyıppan. Quda qálese, sudya bolǵanımda usı mantiyanı kiyemen. Ákemniń ruwxı meni qollaydı”-deydi Ayzada.
Álbette, ótkenlerdi yad etip, olardıń múbárek esteligine húrmet kórsetiw insanıylıqtıń eń joqarı ólshemi.
Qaraqalpaqstan Respublikası hákimshilik sudı