NÍZAMǴA ÁHMIYETLI ÓZGERIS HÁM QOSÍMSHALAR KIRGIZILDI
Qaraqalpaqstan Respublikası sudında prokuratura uyımları menen birgelikte ámeliy seminar ótkerildi. Onda sudyalar hám Qaraqalpaqstan Respublikası prokuraturasınıń juwapker xızmetkerleri qatnastı.
Ilaj dawamında «Ózbekstan Respublikasınıń ayırım nızam hújjetlerine sudlarda islerdi kóriwde prokurordıń wákilliklerin támiyinlewge qaratılǵan ózgerisler hám qosımshalar kirgiziw haqqında»ǵı nızamnıń mazmun-mánisi keńnen dodalandı. Bul nızam menen Ózbekstan Respublikasınıń Puqaralıq processual kodeksine mámlekettiń nızam menen qorǵalatuǵın máplerin qorǵaw maqsetinde prokurordıń qatnasıwı názerde tutılǵan bir qatar áhmiyetli ózgerisler hám qosımshalar kirgizildi.
Atap aytqanda, prokurorǵa jerge baylanıslı huqıqıy qatnasıqlar, mámleketlik múlk, mámleketke jetkerilgen zıyannıń ornın qaplaw hám mámleketlik byudjetten óndiriwge baylanıslı islerde sudlarda qatnasıw jáne mámleket máplerin qorǵaw ushın sudqa arza kirgiziw huqıqı berildi.
Seminar dawamında usı nızamnıń orınlanıwın támiyinlewde sud hám prokuratura uyımlarınıń óz-ara birge islesiwi, prokurordıń qatnasıwı belgilengen islerdiń sud májilislerinde kórip shıǵılıw tártibi, bul wákilliklerdiń ámeliy qollanılıwı sıyaqlı máseleler boyınsha tájiriybe almasıldı.
Sonday-aq, Ózbekstan Respublikası Joqarǵı sudı Plenumınıń 2025-jıl 29-apreldegi «Hákimshilik sudlar tárepinen nızamlı kúshke kirgen sud hújjetlerin jańadan ashılǵan jaǵdaylar boyınsha qayta kóriwdi tártipke salıwshı nızam hújjetlerin qollanıw haqqında»ǵı 9-sanlı hám Ózbekstan Respublikası Joqarǵı sudı Plenumı hám Ózbekstan Respublikası Xojalıq sudı Plenumınıń ayırım qararlarına ózgerisler hám qosımshalar kirgiziw haqqında»ǵı 10-sanlı qararlarınıń áhmiyeti hám mazmunı túsindirildi. Bul Plenum qararları sudyalar hám huqıqtanıwshılar ushın metodikalıq qollanba sıpatında xızmet etiwi menen birge, jańa qararlardıń nadurıs tallanıwınıń aldı alınatuǵını, sud ámeliyatında ádillik hám ashıq-aydınlıqtı támiyinlenetuǵını atap ótildi.