JASLAR ARASÍNDA HUQIQIY MÁDENIYATTI ARTTIRIWǴA QARATILǴAN USHÍRASÍW HÁM KÓSHPELI SUD MÁJILISI ÓTKERILDI
Jınayatshılıq hám huqıqbuzarlıqlardıń aldın alıw, jaslar arasında huqıqıy sana-sezim hám huqıqıy mádeniyattı arttırıw maqsetinde orınlarda sudlar tárepinen ámeliy jumıslar alıp barılmaqta. Usınday ilajlardan biri Nókis rayonlar aralıq hákimshilik sudınıń sudyaları tárepinen Nókis qalasındaǵı Jaslar orayı imaratında shólkemlestirildi.
Dáslep, Nókis rayonlar aralıq hákimshilik sudınıń baslıǵı R.Jumabaev shıǵıp sóylep, jaslar arasında ushırasıp atırǵan jınayatlar hám olardıń aldın alıw boyınsha alıp barılıp atırǵan jumıslarǵa qısqasha toqtap ótti.
Atap aytqanda, jaslar arasında jınayashılıqtı azaytıw ushın ámelge asırılıp atırǵan profilaktikalıq ilajlar, tálim-tárbiya jumısları hám onda huqıqıy úgit-násiyat ilajlarınıń áhmiyetine toqtap ótti.
Bunnan soń, Nókis rayonlar aralıq hákimshilik sudınıń sudyaları A.Saliev, Q.Babanazarov hám S.Karamatdinovalar basshılıǵında kóshpeli sud májilisi ótkerildi. Ilaj sheńberinde real sud dodalawı kórsetilip, onda tiykarınan pensiya tayınlawǵa baylanıslı hákimshilik dawlar kórip shıǵıldı. Sud procesinde pensiya támiynatına baylanıslı máseleler, puqaralardıń huqıqları hám olardı qorǵaw tártibi dodalandı.
Sudyalar tárepinen qatnasıwshılarǵa istiń huqıqıy tiykarları, dálillerdi bahalaw procesi hám qabıl etilgen qarardıń mazmunı túsindirildi. Sonday-aq, jaslarǵa hákimshilik huqıqbuzarlıqlardıń aqıbeti, puqaralıq juwapkershilik hám nızam ústinliginiń áhmiyeti haqqında da maǵlıwmatlar berildi.
Jaslar sud procesin baqlaw arqalı sudlar iskerligi menen jaqınnan tanısıw imkaniyatına iye boldı.
Bunday ilajlar jaslar arasında huqıqıy mádeniyattı, puqaralardıń huqıqıy xabardarlıǵın arttırıw hám nızamlılıqtı bekkemlewde úlken áhmiyetke iye.
