JÍNAYATSHÍLÍQ HÁM HUQÍQBUZARLÍQLARDÍŃ ALDÍN ALÍWDA PUQARALAR MENEN USHÍRASÍP, OLARDÍŃ MASHQALALARÍN ÚYRENIW ÁHMIYETLI
Jınayatshılıq hám huqıqbuzarlıqlardıń aldın alıwda xalıq penen ushırasıw arqalı olardıń mashqalaların úyreniw júdá áhmiyetli rol oynaydı. Sebebi, máhálle belsendileri menen shólkemlestirilgen bunday ushırasıwlar jınayatshılıqtıń azayıwına járdem beriw menen birge, puqaralardıń huqıqıy bilimlerin bekkemlew, ózleriniń huqıq hám minnetlemelerin túsinip, juwapkershiligin arttırıwǵa járdem beredi.
Jınayat isleri boyınsha Nókis rayonı sudınıń tergew sudyası G.Utepbergenova tárepinen rayondaǵı “Samanbay” hám «Baqanshaqlı» awıl puqaralar jıyınlarında aymaq turǵınları menen mine usınday ashıq sáwbetlesiw ótkerildi.
Onda máhálle aymaǵında huqıqbuzarlıq hám jınayatshılıqtıń aldın alıw, jınayattan awlaq qáwipsiz aymaqtı jaratıw boyınsha profilaktikalıq túsinik jumısları alıp barıldı. “2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında”ǵı Prezident qararı tiykarında isleniwi tiyis wazıypalar jóninde de maǵlıwmat berildi.
Sonday-aq, jınayatshılıq hám huqıqbuzarlıqlar kórsetkishi artıp “Qızıl aymaq”qa kirgizilgen máhállelerde jıyın belsendileri menen birge islesiwdiń áxmiyeti, huqıqıy másláhátler hám puqaralardıń huqıqları haqqında sóz etildi.
Xalıq penen turaqlı sáwbetlesiw arqalı olardıń eń tiykarǵı mashqalaları, jumıssızlıq, sana-sezim hám ideologiya menen baylanıslı mashqalalar, jınayat ushın jol ashıwı múmkin bolǵan faktorlardı anıqlawǵa boladı. Sonıń menen birge, adamlardıń tikkeley mashqalaların tıńlap, olarǵa beriliwi múmkin bolǵan huqıqıy járdem hám resurslardı da usınıw júdá áhmiyetli.
Solay eken, sudya tárepinen orınlarda ótkerilip atırǵan bunday ushırasıwlar jınayatshılıqtı kemeytiw arqalı jámiyette huqıqıy mádeniyattı elede jetilistiriwde eń tiykarǵı qádem bolıp tabıladı.