Көшпели суд мәжилисинде үш жынаят иси кѳрилди

 Хожели районы Пәрўаз мәкан пуқаралар жыйынында жайласқан 2-санлы улыўма билим бериў мектебиниң мәжилислер залында болып өткен кѳшпели ашық суд мәжилисинде үш жынаят иси кѳрилди.

 

Атап айтқанда,  Ѳзбекстан Республикасы Жынаят кодексиниң 169-статьясы 1-бѳлими менен айыпланған М.С. исмли пуқара тәрепинен исленген урлық, Жынаят кодексиниң 266-статьясы 1-бѳлими менен айыпланған М.Н. исмли пуқараның ислеген автоавария, Жынаят кодексиниң 25, 168-статьясы 1-бѳлими (алдаўшылық) ҳәм 28, 211-статьясы 1-бѳлими (пара бериў) менен айыпланған Р.Н. исмли пуқараның қарсысына топланған жынаят ислери көрип шығылды.

 

Биринши ҳәм екинши жынаят ислери тәреплердиң ѳз-ара жарасқанлығы, жәбирлениўшилерге келтирилген зыянлар қапланғанлығы мүнәсибети менен Жынаят кодексиниң 661-статьясына тийкарланып ѳндиристен қысқартылды. Жынаят кодексиниң 25, 168-статьясы 1-бѳлими (алдаўшылық) ҳәм 28, 211-статьясы 1-бѳлими (пара бериў) менен айыпланған Р.Н. исмли пуқараның қарсысына топланған жынаят иси бойынша судланыўшыға 2 жыл 1 ай еркинликтен шеклеў жазасы тайынланды.

 

Буннан соң, Хожели районы ИИБ баслығының алдын урлық жынаятын ислеп судланған, суд тәрепинен тайынланған мийнет арқалы дүзетиў ислери жазасын қастан ѳтемей жүрген М.А. исмли судланған шахстың жазасын басқа аўырырақ түрдеги жазаға алмастырып бериўди сораған өтиниши кѳрип шығылды. Бул бойынша М.А.ға оның ѳтелмеген 1 жыл 4 ай 9 күн мүддети Жынаят кодексинин 46-статьясы 4-бѳлимине тийкарланып, еркинен айырыў жазасына алмастырылды. Жазаны мәнзил колонияда ѳтеў белгиленди.

 

Суд мәжилисинде пуқаралар жыйыны ақсақалы, кѳше бийлери, аймақ пуқаралары ҳәм педагоглар қатнасып, олар исленген ҳәр бир жынаят қандай аўыр ақыбетлерге алып келетуғынлығының, жол ҳәрекети қағыйдаларына бойсынбаў аўыр дене жарақатлары алыўға себеп болыўы, инсан ѳлимине алып келиўи, урлық ҳәм алдаўшылық жынаятлары жәбирлениўшилерге мүлклик ҳәм басқада зыян алып келтириўи менен бирге, материаллық қыйыншылыққа дуўшар ететуғынлығы, пара бериў жынаяты – жәмийеттиң аўыр иллети екенлигиниң гүўасы болды.

 

Кѳшпели суд мәжилиси соңында жыйналғанлар судланыўшылардың ис-ҳәрекетлеринен наразы екенлигин билдирип, аймақ ақсақаллары келешекте бундай жынаятқа қол урмаў, бул ислер аймақ турғынларының ҳәр бирине сабақ болыўы кереклиги ҳаққында өзлериниң нәсиятларын берди.

 

И.АЛЛАНИЯЗОВ,

Жынаят ислери бойынша Хожели районы судының баслығы