Ўйланмай босилган қадам, надомат келтирди

2 йилга қамалиб чиққанидан тегишли хулоса чиқармади, у 34 ёшида яна ўғирликка қўл урди ва ҳавфли рецивист «мақомига» эга бўлди.

Бахром 2022 йил 19 март кунидан 20 март кунига ўтар кечаси тунги вақтда туманнинг Мустақиллик маҳалласида яшовчи Умрзоқ отанинг уйи ёнидаги молхонаси ёнига бориб, атрофда ҳеч ким йўқлигидан ва хонадон эгаларининг ухлаб ётганлигидан фойдаланиб, молхонага ғайриқонуний равишда кириб, бозор баҳоси 4 миллион сўм бўлган бир бош қора молини ўғирлаб, воқеа жойидан яширинади.

Ўғирланган қора молни нотаниш кишиларга арзон гаровга сотиб, 10 кун ичида еб-ичиб, кайфу-сафога ишлатиб тугатган Бахром яна «овга» чиқди. Бу сафар у ярим тунда туман марказида яшовчи Гулрух опанинг молхонасига бориб, ҳар бирининг бозор баҳоси 800 минг сўм бўлган икки бош эчкиларини ўғирлаб, воқеа жойидан яширинади.

Шундай қилиб, Бахром Ўзбекистон Республикаси ЖКнинг 169-моддаси 3-қисми «а» бандида назарда тутилган жиноятни қасддан содир қилган.

Суд, судланувчига жазо тайинлашда, унинг қилмишидан пушаймонлигини, моддий зарар қопланганини, жабрланувчиларнинг унга даъвоси йўқлигини жазони енгиллаштирувчи ҳолат деб, илгари қасддан жиноят содир қилиб, судланганидан сўнг янгидан қасддан жиноят содир қилганлигини жазосини оғирлаштирувчи ҳолат деб баҳолаб, судланувчининг хулқини озодликдан маҳрум қилиш жазоси тайинламасдан туриб тузатиш мумкин эмас деган қатъий тўхтамга келиб, 4 йил озодликдан маҳрум қилиш жазосини тайинланди.

«Қилмиш-қидирмиш» деб бежизга айтилмаган, ўйламасдан босилган қадам афсус ва надомат келтириши аниқ…..

 

Ибрайым Алланиязов,

Жиноят ишлари бўйича

Хўжайли туман судининг раиси