ҚАРАҚАЛПАҚСТАН РЕСПУБЛИКАСЫ СУДЫ
ҚАРАҚАЛПАҚСТАН РЕСПУБЛИКАСЫ СУДЫ
2022-жыл 8-июнь күни Қарақалпақстан Республикасы суды ҳәм Қарақалпақстан Республикасы ҳәкимшилик судының басшылары тәрепинен көшпели қабыллаў өткериледи.
Қабыллаўда Нөкис, Хожели, Тақыятас, Кегейли районлары ҳәм Нөкис қаласы пуқараларының суд-ҳуқық тараўына байланыслы мүрәжатлары тыңланады.
Қабыллаў өткерилетуғын орын: Нөкис районындағы 15-санлы балалар музыка ҳәм көркем-өнер мектеби имараты.
Қабыллаў ўақты: 8-июнь, саат 10:00 ден 13:00 ге шекем
Ҳәзирги күнде, Өзбекстан Республикасы Шаңарақ кодексиниң 15-статьясына көре, неке жасы ерлер ҳәм ҳаяллар ушын 18 жас етип белгиленген.
Кодекстиң алдыңғы, 2019-жыл 28-августке шекем әмелде болған редакциясында бул норма басқашарақ яғный, неке жасы ерлер ушын 18 жас, ҳаяллар ушын 17 жас деп белгиленген еди.
Ҳәммемизге белги, соңғы жылларда мәмлекетимизде Конституцияда беккемленген ҳалықаралық ҳуқықтың улыўма тән алынған қағыйдалары үстинлиги принципин турмысқа енгизиў бағдарында рефомалар күшейттирилмекте.
Яғный, биздеги алдынғы норма БМШниң 1989-жыл 20-ноябрьдеги “Бала ҳуқықлары ҳаққында”ғы Конвенциясының 1-статьясында белгиленген “18 жасқа жетпеген ҳәр қандай инсән заты бала есапланады” деген ҳалықаралық ҳуқық қағыйдасына қайшы келер еди. Ал, Өзбекстан бул халықаралық Конвенцияға 1992-жылда қосылған.
Соның менен бирге алдынғы норма Өзбекстан Республикасы “Бала ҳуқықларының кепилликлери ҳаққында”ғы Нызамында белгиленген бала – “бул он сегиз жасқа толығанға, (ер жеткенге) шекем болған шахс” деп белгиленген түсиникке де қайшы келер еди.
Соннан келип шыққан ҳалда бүгинги күнде Шаңарақ кодексиниң неке жасына байланыслы нормасы ҳалықаралық ҳуқыққа муўапықластырылып, бул саладағы миллий нызамышылық пенен унификацияланды.
Нызамшылықтағы бул өзгерислер келешек аналары болған ҳаял-қызларымыздың еркинлигин тәмийинлеўде оғада үлкен әҳмийетке ийе болып табылады.
Еркин Утениязов,
Қарақалпақстан Республикасы судының судьясы
Шаңарақ – жәмийет тийкары. Шаңарақ турмысының ҳәмме мәселелери –ерли зайыплылар тәрепинен өз-ара разылық тийкарында биргеликте шешиледи. Шаңарақты қоллап-қуўатлаў ҳәм бала мәплерин қорғаўға қаратылған конституциялық нормалардың әмелге асырылыўы бир қатар нызам ҳәм нызамасты ҳүжжетлеринде өз сәўлелениўин тапқан.
Өзбекстан Республикасында Шаңарақ ҳаққындағы нызам ҳүжжетлериниң ўазыйпалары шаңарақты беккемлеўден, шаңарақ мүнәсебетлерин өз-ара муҳаббат, исеним ҳәм ҳүрмет, бирлик, бир-бирине жәрдем бериў ҳәмде шаңарақ алдында оның бәрше ағзаларының жуўапкершилиги сезими тийкарында қурыўдан, кимниңдур шаңарақ мәселелерине өзбасымшалық пенен араласыўына жол қоймаслықтан, шаңарақ ағзалары өз ҳуқықларын тосқынлықсыз әмелге асырыўын ҳәмде бул ҳуқықлардың қорғалыўын тәмийинлеўден ибарат.
Тиллекке қарсы ҳәзирги күнде пуқаралық ислери бойынша судларда көрилип атырған ислердиң басым көпшилигин ерли-зайплылардың некеден ажырасыў ҳаққындағы ислер қурамақта. Ҳәммемизге белгили шаңарақ мүнәсебетлеринен келип шығатуғын даўлар дерлик барлық жағдайда да бири-биринен келип шығатуғын басқада даўлар менен байланысып кетеди. Яғный, ажырасқан жағдайда ерли зайыплылар ортасындағы улыўма мүлклерди бөлиў, ҳәр бириниң шахсый мүлклерин яки балалардың мүлклерин алып бериў, ортада перзентлердиң кимниң тәрбиясында қалыўы мәселеси, ерли-зайыплылардың өз-ара ҳәм балалар ушын тәмийинат өндириў мәселелери ҳ.т.б.
Усындай шаңарақ мүнәсебетлеринен келип шығатуғын ҳәм көпшилик жағдайларда тек ғана суд арқалы шешилетуғын тартыслардың бир бул ерли-зайыплардың ортасындағы мүлкий даўлар болып табылады.
Пуқараларымыз арасында бул саладағы мүнәсебетлерди тәртиплестириўде нызамшылықта белгиленген ҳуқықый механизмлерден туўры пайдаланылмастан, өзи боларлыққа салыў еледе даўам етпекте.
Мәселен, Өзбекстан Республикасы Шаңарақ кодексиниң 6-бабы «Ерли-зайыплылардың мал-мүлкиниң шәртнамалық тәртиби» деб аталып, бунда ерли-зайплылыр ортасында неке шәртнамасын дүзиў тәртип-қағыйдалары белгилеп берилген.
Яғный, некелениўши шахслардың яки ер ҳәм ҳаялдың некеде болған дәўирде ҳәм (яки) ер ҳәм ҳаял некеден ажырасқан жағдайда олардың мүлкий ҳуқық ҳәмде мәжбүриятларын белгилеўши келисими неке шәртнамасы деп есапланады.
Неке шәртнамасы неке мәмлекетлик дизимге алынғанға шекем де, сондай-ақ неке дәўиринде де дүзилиўи мүмкин. Неке мәмлекетлик дизимге алынғанға шекем дүзилген неке шәртнамасы неке мәмлекетлик дизмиге алынған күннен баслап күшке киреди.
Неке шәртнамасы жазба түрде дүзиледи ҳәм нотариал тәртипте тастыйқланыўы лазым. Ерли-зайыплы неке шәртнамасына көре биргеликтеги улыўмалық мүлктиң нызамда белгиленген (усы Кодекстиң 23-ст.) тәртибин өзгертириўге, ер ҳәм ҳаялдың бәрше мал-мүлкине, оның айырым түрлерине ямаса ер ҳәм ҳаялдан ҳәр бириниң мал-мүлкине қарата биргеликтеги, үлесли яки өз алдына ийелик қылыў тәртибин орнатыўға ҳақылы.
Неке шәртнамасы ер ҳәм ҳаялдың бар болған мал-мүлкине қарата да, келешектеги мал-мүлкине қарата да дүзилиўи мүмкин.
Ер ҳәм ҳаял неке шәртнамасында өзара материаллық тәмийинат бериў, шаңарақ қәрежетлерин көтериў, бир-бириниң дәраматында қатнасыў, басқа шахслар менен мүлкий шәртнамалар дүзиў, биргеликте исбилерменлик искерлиги менен шуғылланыў бойынша өз ҳуқық ҳәм мәжбүриятларын белгилеп алыўға, некеден ажыралғанда ер ҳәм ҳаялдан ҳәр бирине берилетуғын мүлкти анықлап алыўға, сондай-ақ неке шәртнамасына ер ҳәм ҳаялдың мүлкий мүнәсебетлерине тийисли басқа қағыйдалар киритиўге ҳақылы.
Неке шәртнамасында нәзерде тутылған ҳуқық ҳәм мәжбүриятлар белгили мүддет пенен шеклениўи яки белгили жағдайлардың жүзега келиўи ямаса келмеслигине байланыслы қылып қойылыўы мүмкин.
Неке шәртнамасы ерли-зайыплының ҳуқық уқыплылығы яки ҳәрекет уқыплылығы, олардың өз ҳуқықларын қорғаў ушын судқа мүрәжат қылыў ҳуқықларын шеклеўди, ерли-зайыплы ортасындағы жеке мүлкий емес мүнәсебетлерди, ерли-зайыплының балаларға қарата болған ҳуқық ҳәм мәжбүриятларын тәртипке салыўды, мийнетке жарамсыз тәмийинат алыўға мүтәж ер яки ҳаялдың ҳуқықын шеклеўши қағыйдаларды, ер ҳәм ҳаялдан бирин өте қолайсыз жағдайға салып қойыўшы ямаса шаңарақ ҳаққындағы нызам ҳүжжетлериниң нормаларына қайшы келиўши басқа шәртлерди нәзерде тута алмайды.
Неке шәртнамасын орынлаўдан бир тәреплеме бас тартыўға жол қойылмайды. Неке шәртнамасы ерли-зайыплының бириниң талабы менен Өзбекстан Республикасы Пуқаралық кодексинде белгиленген тийкарларда ҳәм тәртиплерде судтың қарары менен өзгертилиўи ямаса бийкар етилиўи мүмкин.
Неке мүнәсебетлери тамамланған ўақыттан баслап неке шәртнамасының әмел етиўи де тамамланады. Неке шәртнамасында неке тамамланғаннан кейинги ўақыт ушын нәзерде тутылған мәжбүриятлар бул жағдайлардан тысқары.
Неке шәртнамасы төмендеги жағдайларда ҳақыйқый емес деп табылады. Неке шәртнамасы суд тәрепинен Өзбекстан Республикасы Пуқаралық кодексинде нәзерде тутылған тийкарлар бойынша толық ямаса қысман ҳақыйқый емес деп табылыўы мүмкин. Неке шәртнамасы ерли-зайыплының нызам менен белгиленген ҳуқықы ҳәм еркинликлерин бузса суд ерли-зайыплының бириниң талабына тийкар неке шәртнамсын толық ямаса қысман ҳақыйқый емес деп табыўы мүмкин. Ерли-зайыплылар нызамда жол қойылатуғын барлық мүлкий шәртнамалық мүнәсебетлерге өз-ара кирисиўге ҳақылы, ерли-зайыплының орталарында дүзилген, олардың бириниң ҳуқықларын шеклеўге қаратылған келисимлер ҳақыйқый деп есапланбайды.
Жуўмақалап айтқанда ерли-зайыплылар ортасында неке шәртнамасының дүзилиўи, олардың өз-ара ҳәм шаңарақтың басқа ағзалары (ерли-зайыптың ата-аналары)ның ортасында келешекте жүзеге келиўи мүмкин болған көплеген тартыслардың, өз ҳуқық ҳәм миннетлемелериниң әмелге асыўын талап етиў бойынша әўерегершиликлердиң алдын алған болар еди деп қаламыз.
Еркин Утениязов,
Қарақалпақстан Республикасы суды судьясы
Қарақалпақстан Республикасы судының кадрлар резервине таңлаў жәрияланады.
Таңлаўда жоқары юридикалық мағлыўматқа, қәнийгелиги бойынша 2 жыллық үзликсиз мийнет стажына, соннан район (қала), районлараралық судларда 1 жыллық мийнет стажына ийе болған Ɵзбекстан Республикасы пуқаралары қатнасыўы мүмкин.
Таңлаўда қатнасыўды қәлеўшилер 2022-жыл 03-июнь күни саат 16:00 ге шекем Қарақалпақстан Республикасы судына арза менен тɵмендеги ҳүжжетлерди қосымша еткен ҳалда мүрәжаат етиўи мүмкин:
– талабанның объективкасы ҳәм жақын туўысқанлары ҳаққында мағлыўматнама;
– дипломның нусқасы (сырт елде оқығанлығы ҳаққындағы дипломға, диплом тән алынғанлығы ҳәм нострификация етилгенлигин тастыйықлаўшы гүўалық);
– талабанның паспорт нусқасы;
– мийнет дәптершеси нусқасы.
Таңлаўда Ɵзбекстан Республикасы Жоқарғы судының веб-сайтына жайластырылған сораўлардан пайдаланылады: http://sud.uz/аттестация-саволлари
Байланыс ушын телефон номери: (55) 102-40-42 (129)
Электрон почта мәнзили: qrs.kadr@sud.uz
Таңлаўды ɵткериў ўақты ҳаққында қосымша хабар етиледи.
Мәнзил: Нɵкис қаласы, И.Каримов кɵшеси 122-жай
Мағлыўмат ушын: Қарақалпақстан Республикасы судының судья аға жәрдемшиси (Ɵзбекстан Республикасы Судьялар жоқарғы мектебинде оқыўда болғанлығы ушын ўақтынша вакант) лаўазымы вакант.
Шаңарақ муқаддес дәргай. Ата-бабаларымыз әзелден шаңарақты усылай қадирлеп, онда перзентлердиң дүньяға келип, әўладлар даўамлылығының беккем қорғаны сыпатында қәдирлеп келген. Шаңарақта әке басшы, ана болса оның орынбасары, перзентлери мине усы шаңарақтың беккемлигин ҳәм аўызбиршилигин тәмийинлеўде әҳмийетли роль тутады.
Малика менен Манас (атлары өзгертилген) 2008-жылы жақсы нийетлер менен бир көпшикке бас қойып, турмыс қурады. Бул еки жас жубайдың мухаббаттың қүдиретинен жүреклери шәўкилдеп, турмыс машқаласынан, оның аўыр жүгинен аўлақ бахытлы күнлери өте баслады. Сол арада 2009-жылы биринши идиралды перзенти Қыяс туўылады, буннан соң 2012-жылы Мадина, 2018-жылы Жәдигер дүньяға келеди. Ҳәр бир перзенти дүньяға келгенде өзинде жоқ шексиз қуўанышқа бөленген Манастың кейин ала минезиде өзгерип, өз ерк-ықрарына күши жетпей ишиўшиликке берилип кетеди.
«Бир күн урыс-жәнжел болған үйден қырқ күн берекет көтериледи» дегениндей Манас ишип келип үйде урыс шығаратуғын, ҳәтте кишкене балаларына болыўына қарамастан Маликаға қол көтеретуғын әдет шығарды. Күнлер усылай өте берди. Енди өзине болған мухаббаттың сөнгенин, және минезлериде бара-бара бир-бирине туўры келмей үйде урыстың көбейип кеткенин, Манастың да өзгермеслигин түсинген Малика жәнжелли күнлердиң биринде үш баласын ертип төркинке кетип қалады.
Бул арада Манаста қылған қылмысынан шын кеўилден пушайман болып, бала-шағасын үйине алып қайтыўдың илажын таппай арақ пенен жолдас болып жүре береди. Буннан Маликаның әбден ары келип, ҳәтте перзентлери де күйеўиниң көзине көринбегенине ашыўланып, ажырасыў ушын судқа арза менен мүрәжат етеди.
Пуқаралық ислери бойынша Нөкис районлараралық суды тәрепинен 2021-жыл июль айында еки жасты некеден ажыратыў бойынша ис көрип шығылып, суд тәреплердиң пикирлерин тыңлап, оларды турмыстан ажыратып, үш баланы тири жетим етиў ушын жетерли дәлийллер келтирилмеген деп есаплап, Маликаның даўа арзасын қанаатландырмастан қалдырады. Суд шаңарақты жарасыўға шақырды. Сонда да, Малика өз пикиринен қайтпай және Қарақалпақстан Республикасы судының пуқаралық ислери бойынша судлаў коллегиясына пуқаралық ислери бойынша Нөкис районлараралық суды 2021 жыл 24 июльдағы бийлигин бийкар етиўди сорап апелляциялық шағымын келтиреди. Бул ис ашық суд мәжлисинде көрип шығылып, коллегия ағзалары да талапкердиң ҳәм ўәкилдиң түсиндирмелерин тыӊлап, апелляциялық шағымда келтирилген ўәжлерди ис ҳүжжетлери менен биргеликте үйренип ҳәм додалап, биринши инстанция судының бийлигин өзгериссиз, апелляциялық шағымды қанаатландырмастан қалдырыўды лазым тапты.
Себеби, ис бойынша анықланған ҳалатларға қарағанда, тәреплер 2008-жыл май айында турмыс қурған, 2009-жыл Қараөзек районы ПҲАЖ бөлими арқалы нызамлы некеден өткен. Орталарында 2009-жылы, 2012-жылы ҳәм 2018-жылы туўылған перзентлери бар. Тәреплер өз-ара келиспеўшиликлер себепли 2020-жыл март айынан баслап бөлек жасап атырған.
Өзбекстан Республикасы Шаңарақ кодексиниң 41-статьясына көре, егер суд ер ҳәм ҳаялдың буннан былай биргеликте жасаўына ҳәм шаңарақты сақлап қалыўға мүмкиншилиги жоқ деп тапса, оларды некеден ажыратады.
Сондай-ақ, Өзбекстан Республикасы Жоқарғы Суды Пленумының «Судлар тәрепинен некеден ажыратыў менен байланыслы ислер бойынша нызамшылықты қоллаў әмелияты ҳақкында»ғы 2011-жыл 20-июль күнги 6-санлы қарарының 14-бәнти, 1-хатбасына көре, некеден ажыратыў менен байланыслы ислер бойынша нызамлы ҳәм тийкарлы бийлик қабыл етилиўи ушын суд истиң ҳақыйқый жағдайларын ҳәр тәреплеме, толық ҳәм қалыс тексерип шығыўы, сондай-ақ ерли-зайып ортасындағы өз-ара мүнәсебетлер жағдайын, некеден ажыратыў мәселеси қойылыўына тийкар болған себеплер, ерли-зайып ортасындағы келиспеўшиликтиң анық себеплерин анықлаўы шәрт. Сол мақсетлерде, суд исти еки тәреп қатнасыўында көриўи лазым, усы Қарардың 16-бәнтине көре, некеден ажыратыў ҳаққындағы талап, тек ғана ерли-зайып буннан былай бирге жасаўларының ҳәм шаңарақ пүткиллей бузылғанлығы себепли оны сақлап қалыўдың иләжи жоқлығы анықланған ҳалда ғана қанаатландырылыўы лазым. Турмыста кешетуғын ўақтыншалық келиспеўшиликлер ҳәм күтилмеген себеплерге көре ерли-зайып ортасында келип шыққан қарама-қарсылықлар, сондай-ақ ерли-зайыплының биреўи яки ҳәр екеўиниң тийкарлы ўәжлер келтирмеген ҳалда неке мүнәсебетлерин даўам еттириўди қәлемеслиги некеден ажыратыў ушын жетерли тийкар бола алмайды. Некеден ажыратыўға тийкарлар болмағанда, суд даўаны қанаатландырмастан қалдырады.
Биринши инстанция суды тәрепинен талапкер Маликаның некеден ажыратыўға тийкарлы ўәжлер келтирмеген ҳалда неке мүнәсебетлерин даўам еттириўди қәлемеслиги некеден ажыратыў ушын жетерли тийкар бола алмайтуғынлығы, қала берсе жуўапкер Манаста перзентлерин тири жетим болыўын қәлемейтуғынлығы, жарасыўды қәлейтуғынлығы ҳәм шаңарағын сақлап қалыў ушын ҳәрекет ететуғынлығы итибарға алынып даўа арзаны қанаатландырмастан қалдырыў ҳаққында дурыс жуўмаққа келинген, деп коллегия есаплап, биринши инстанция суды бийлигин өзгериссиз қалдырыўды лазым тапты.
Абатбай Аяпов,
Қарақалпақстан Республикасы суды судьясы
Жаңа туўылған нәрестелер — ҳәзирги ўақытта дүнья жүзинде адам саўдасының көп пайызын қураўы ашшы ҳақыйқат.
Хош, буның алдын алыў мүмкинбе?
Әлбетте мүмкин. Егер биз жас аналарды бул жолдан қайтара алсақ, турақлы түрде профилактик сәўбетлер өткерсек, жәмийет тәрепинен алданған қызларға пәс нәзер менен қаралмаса, зорлыққа ушыраған ҳаял дуньяға келтириўи мүмкин болған баланың “ҳарамы” дейилиўине жол қойылмаса яки улыўма буның алды алынса.
Бир қарағанда, үрп-әдетлерге тийкарланған жәмийетте унамсыз иллетлерге орын жоқ. Биринши нәўбетте, муқәддес динимизде ҳәр қандай зорлықты-биреўдиң ҳаялына (қызына, сиңлисине) жаман көз бенен қараў қатты қараланады.
Бирақ бизлер 21-әсирде жасап атырмыз. Қәлеймизбе-жоқпа, глобалласыў процесси кетип атыр. Усы процесс бизиң жәмийетимизди де шетлеп өтип атырған жоқ. Мың жыллық қәдириятларымыз ҳәм дәстүрлеримизгеде шаң салмақта. Сол себепли, социаллық тармақларда “Зорлады, некесиз бала туўылды, баласын сатыўға урынды» сыяқлы хабарлар тез-тез көзге түседи. Жасларымыздың дерлик көп ўақты интернетте социаллық тармақларды пайдаланыў менен өтеди. Олардың қызығыўшылығын шеклеўдиң мүмкиншилиги жоқ. Тек ғана бир жолы бар, ол да болса жаслығынан үрп-әдетлеримизди қулағына сиңдириў.
Қандай қызлар алданып қалады? Көбинисе, шаңарағы тыныш емес, жетиспеўшиликте жасайтуғын, мүтажлиги бар шаңарақлар қызлары. Буның тийкарғы себеби, шаңарақта мийрим көрмей өскен қызды алдаў оғада аңсат.
Неге бизлерде алданған қызлар ҳәммениң жеркенишине себеп болып, баланы үйине алып кетиўи керек? Неге баланы дүньяға келтириўде “үлесин” қосқан жигит шетте қалыўы керек? Себеби, “ДНК” тестлерин өткериўге, судласыўға мүтажлиги бар шаңарақлардың пули жоқ. Солай екен, дүнъяға келтирилген алдаў мийўеси болған баланы өз-өзинен тәрбиялаўдың мүмкиншилиги жоқ. Сол себепли бала саўдасы менен байланыслы жынаятлар күн сайын көбейип атыр.
Ҳәр бала туўылыўы менен Өзбекстан Республикасы Конституциясында белгиленгениндей оның пуқаралық ҳуқықлары пайда болады. Солай екен, бала сатыў-жынайый жуўапкершиликке алып келеди.
Азат Сейтанов,
жынаят ислери бойынша Нөкис район суды баслығы
Бүгин Қараөзек районы 16-санлы балалар музыка ҳәм көркем-өнер мектеби имаратында «Ҳаяллар дәптери» не киритилген, ҳуқықый мәсләҳәтге мүтәж болған ҳаял-қызлар менен ушырасыў болып өтти.
Оған Шымбай районлар аралық пуқаралық ислери бойынша суды баслығы М. Сапаев, Шымбай районлар аралық экономикалық суды баслығы З. Бердимуратов, Жынаят ислери бойынша Қараөзек районлық суды баслығы Ж. Алланиязов, Қараөзек районы ҳәкими орынбасары шаңарақ ҳәм ҳаял-қызлар бөлими баслығы П. Утениязовалар қатнасты.
Ушырасыўға қатнасқан ҳаял-қызлар өзлерин қыйнап жүрген машқалалары бойынша мүрәжетлерин билдирди ҳәм судялар тәрепинен ҳуқықый түсиниклерге ийе болды.
Қарақалпақстан Республикасы район (қала), районлараралық судларының кадрлар резервине таңлаў жәрияланады.
Таңлаўда жоқары юридикалық мағлыўматқа ийе болған Ɵзбекстан Республикасы пуқаралары қатнасыўы мүмкин.
Таңлаўда қатнасыўды қәлеўшилер 2022-жыл 25-май күни саат 18:00 ге шекем Қарақалпақстан Республикасы судына арза менен тɵмендеги ҳүжжетлерди қосымша еткен ҳалда мүрәжаат етиўи мүмкин:
– талабанның объективкасы ҳәм жақын туўысқанлары ҳаққында мағлыўматнама;
– дипломның нусқасы (сырт елде оқығанлығы ҳаққындағы дипломға, диплом тән алынғанлығы ҳәм нострификация етилгенлигин тастыйықлаўшы гүўалық);
– талабанның паспорт нусқасы;
– мийнет дәптершеси нусқасы.
Таңлаўда Ɵзбекстан Республикасы Жоқарғы судының веб-сайтына жайластырылған сораўлардан пайдаланылады: http://sud.uz/аттестация-саволлари
Байланыс ушын телефон номери: (55) 102-40-42 (129)
Электрон почта мәнзили: qrs.kadr@sud.uz
Мәнзил: Нɵкис қаласы, И.Каримов кɵшеси 122-жай
Мағлыўмат ушын: Қарақалпақстан Республикасы жынаят ислери бойынша Қараөзек районы судының кеңсе меңгериўшиси лаўазымы вакант.
Таңлаўды ɵткериў ўақты ҳаққында қосымша хабар етиледи.
Интернеттеги социаллық тармақлардан пайдаланғанда ҳәр биримизден итибарлы болыў талап етиледи. Себеби, оның өзине тән тәртип-қығыйдасы бар. Деген менен айырымлар буны түсинбестен, қәлеген хабарды тарқатып, қәтеликке, ҳәттеки жынаятқа жол қояды.
Хожели районында жасаўшы Г.Қ.ҳәм Г.А. «телеграм» интернет тармағы арқалы Өзбекстан Республикасына алып кириў, таярлаў ҳәм тарқатыў қадаған етилген диний баянатты тарқатып, жынаятқа жол қойған. Жынаят ислери бойынша Хожели районы судының гезектеги суд мәжилисинде мине, усы жынаятлы ис көрип шығылды.
Мәлим болғанындай, Г.Қ. диний қызығыўшылығы нәтийжесинде «телеграм» интернет тармағы арқалы өзиниң «Samsung J5» маркалы уялы телефонына Рафик Камаловтың 8-март байрамы ҳәм оның тарийхы ҳаққындағы «2_5339054376570850013»деп аталған догматикалық идеялары менен уйғынласқан диний баянатты жүклеп алып, 2021-жылы 8-март күни телеграм каналындағы 24 ағзасы бар «Тuwisqanlar» группасына тарқатқан.
Судланыўшы Г.А.да «телеграм» интернет жәҳән тармағындағы «you toube» арқалы өзиниң «Samsung J4» маркалы уялы телефоны аппаратына Рафик Камаловтың 8-март байрамы ҳәм оның тарийхы ҳаққындағы «2_5339054376570850013» деп аталған догматикалық идеялары менен уйғынласқан диний баянатты жүклеп алып, 2021-жылы 8-март күни тегерамм каналындағы 16 ағзасы бар «Синфдошлар 9г» группасына тарқатқан.
Өзбекстан Республикасы Министрлер Кабинети жанындағы Дин ислери бойынша комитети экспертлери тәрепинен өткерилген диний-комплекс экспертизасының 2021-жылы 6-апрель күнги ИП-595-санлы жуўмағы бойынша «2_5339054376570850013» файлдағы мағлыўмат догматикалық идеялары менен уйғынласқан болып, оны Өзбекстан Республикасына алып кириў, таярлаў ҳәм тарқатыў қадаған етилген.
Солай етип, олар жоқарыдағы ҳәрекетлери менен Өзбекстан Республикасы Жынаят Кодексиниң 2441-статьясы 3-бөлими «г» бәнтинде нәзерде тутылған жынаятты қастан ислеген.
Судланыўшыларға жаза тайынлағанда, олардың қылған исинен шын кеўилден пушайман екенлиги, алдын судланбағанлығы, биреўиниң шаңарағынан ажырасқанлығы, қарамағында ер жетпеген перзентлери бар екенлиги, жасаў орнындағы мәкан пуқаралар жыйының баслықлары ҳәм профилактика инспекторлары тәрепинен жақсы минезлемеге ийе екенлиги есапқа алынды.
Суд ҳүкими менен пуқаралар Г.Қ. ҳәм Г.А.ға Өзбекстан Республикасы Жынаят Кодексиниң 2441-статьясы 3-бөлими «г» бәнти менен Жынаят Кодексиниң 57-статьясы қолланылып, 4 (төрт) жыл мүддетке азатлықтан шеклеў жазасы тайынланды.
И.АЛЛАНИЯЗОВ,
Жынаят ислери бойынша Хожели районлық судының баслығы
Жəмийетте коррупция иллети өзиниӊ түрли көринислери менен сəўлелениўи мүмкин, бул бойынша барлық ҳуқықты қорғаў органлары, сондай-ақ, кеӊ жəмийетшилик усы иллетке қарсы гүресиўимиз дəркар.
Мəмлекетимизде басқышпа-баскыш əмелге асырылып атырған раўажланыўлардыӊ тийкарғы мақсетлеринен бири инсан ҳуқық, еркинлиги ҳəмде нызамлы мəплерин исенимли қорғаўдан ибарат.
Жəмийетте нызам үстинлигин тəмийинлеў, пуқаралардыӊ ҳуқықый мəдениятын асырыў, пуқаралардыӊ нызамларға бойсыныўы ҳəмде ҳүрмет етиў руўхында тəрбиялаў демократиялық, ҳуқықый мəмлекет ҳəмде еркин пуқаралық жəмийетти қурыўда əҳмийетли ўазыйпалардан бири есапланады.
Ҳəр бир пуқара Конституцияда белгиленген мəжбүриятларын сөзсиз орынлап барыўы керек.
Коррупция иллетининӊ көринислери айрым ўақытлары ашықтан-ашық көринбеслиги ҳəм мүмкин, бул көринислер жасырын формада, мəселен саўғалар бериў ямаса илтимаслар арқалы өз мүтəжликлерин питкериў сыяқлы.
Айрым ҳалларда өз хызмет ўазыйпалары менен байланыслы ҳалда əмелге асырылыўы мүмкин. Буған мысал ретинде, усы жылдыӊ февраль айында жынаят ислери бойынша Елликқала район судында көрип шығылған жынаят иси мазмунында өз сəўлелениўин тапқан.
Пуқара А.Н. Төрткүл районында жайласқан авто мектепте жумыс ислегенинен пайдаланып, буннан алдын алдаўшылық жынаяты менен судланғанлығынан өзине тийисли жуўмақ шығармастан, жеӊил жоллар менен байлық арттырыўды өзине мақсет қылып, Төрткүл районы “Дўстлик” МПЖ да жасаўшы пуқара Ш.С. ны өзиниӊ лаўазымлы таныслары арқалы транспорт қуралын басқарыў ушын айдаўшылық гүўалығын алып бериўди ўəде етип оннан пара сыпатында 2 700 000 сўм пул талап қылып оны пара бериўге ийтермелеп, дəслеп 2020-жылдыӊ октябрь айында усы соралған пулдың 1 000 000 сўмын алдын ала алып, қалған бөлегин 2021-жыл 12-апрель күни Төрткүл районында жайласқан “Руслан” кафеси алдында алдаўшылық жолы менен алған ўактында дəлийллер менен бирге ҳуқық қорғаў уйымлары ўәкиллери тәрепинен иркиўге алынады.
Бул пуқараға суд тəрепинен нызамда белгиленген тийисли жаза шарасы қолланылды.
Бул жағдайдан көринип турғанындай жəмийетимизде бул унамсыз иллеттиӊ алдын алыў, оған имкəният жаратыўшы ҳəр қандай көринислерге қатаң қарсы гүресиўде бəршемиз бирдей қатнасыўымз тийис.
ОРАЗБАЙ МАЎЛЕНОВ,
Жынаят ислери бойынша Елликқала районы суды баслығы